ព័ត៌មានជាតិ
នាយករដ្ឋមន្ត្រីជប៉ុន បានអញ្ជើញមាតុភូមិនិវត្តន៍ទៅកាន់ប្រទេសជប៉ុនវិញ បន្ទាប់បញ្ចប់ដំណើរទស្សនកិច្ចនៅកម្ពុជា
ភ្នំពេញ៖ នាយករដ្ឋមន្ត្រីជប៉ុន ឯកឧត្តម គីស៊ីដា ហ្វូមិអុគីស៊ីដា ទើបបញ្ចប់ដំណើរទស្សនកិច្ចផ្លូវការនៅកម្ពុជា និងបានអញ្ជើញមាតុភូមិនិវត្តន៍ទៅកាន់ប្រទេសជប៉ុនវិញ ហើយនៅព្រឹកថ្ងៃទី២១ ខែមីនា ឆ្នាំ២០២២នេះ។
គួរបញ្ជាក់ថា ឯកឧត្តម គីស៊ីដា ហ្វូមិអុគីស៊ីដា នាយករដ្ឋមន្ត្រីជប៉ុន បានដឹកនាំគណៈប្រតិភូបំពេញទស្សនកិច្ចផ្លូវការនៅកម្ពុជា ពីថ្ងៃទី២០–២១ ខែមីនា ឆ្នាំ២០២២ ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានអញ្ជើញទទួលស្វាគមន៍ជាផ្លូវការនៅវិមានសន្តិភាព រាជធានីភ្នំពេញ ដោយមានការអញ្ជើញចូលរួមពីតំណាងអង្គទូតនានានៅកម្ពុជា មន្ត្រីរាជរដ្ឋាភិបាលកម្ពុជា និងមន្ត្រីប្រតិភូសំខាន់ៗនៃប្រទេសជប៉ុន។
តាមរយៈដំណើរបំពេញទស្សនកិច្ចផ្លូវការរបស់នាយករដ្ឋមន្ត្រីជប៉ុននៅពេលនេះ គឺដើម្បីពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ រួមមាន៖ ក្នុងវិស័យពាណិជ្ជកម្ម និងការវិនិយោគ អប់រំ ហេដ្ឋារចនាសម្ព័ន្ធ ការពារជាតិ និងសន្តិសុខ និងការស្តារសង្គម–សេដ្ឋកិច្ចឡើងវិញ ក្រោយវិបត្តិនៃជំងឺកូវីដ–១៩ ព្រមទាំងវិស័យផ្សេងៗទៀត៕
