អាវុធហត្ថរាជធានីភ្នំពេញ ទទួលអំណោយពី ក្រុមហ៊ុនតារា ធីស៊ី ហ្គាស

ភ្នំពេញ ៖ នៅថ្ងៃទី១៩ ខែមីនា ឆ្នាំ២០២៣ អាវុធហត្ថរាជធានីភ្នំពេញ បានទទួលអំណោយពីក្រុមហ៊ុនតារា ធីស៊ី ហ្គាស សម្រាប់ជាអំណោយផ្តល់ដល់កងកម្លាំង ក្នុងឱកាសអបអរបុណ្យចូលឆ្នាំថ្មីប្រពៃណីជាតិខ្មែរ ខាងមុខ ។

លោក ថន សេងតារា អគ្គនាយកក្រុមហ៊ុនតារា ធីស៊ី ហ្គាស បានឲ្យដឹងថា បាននាំដែលត្រូវបាន នាំយកមកប្រគល់ជូននាពេលនេះ មានចំនួន០៧មុខ ៖ ភេសជ្ជះប៉ូវកម្លាំង Zorus ចំនួន ២,០០០ កេស, ទឹកសុទ្ធ ចំនួន ១,០០០ យួរ, សាប៊ូម្សៅ ចំណុះ ៤០០g ចំនួន ២០០ ការុង, សាប៊ូដុសខ្លួន ចំណុះ 1L ចំនួន ១០០ កេស, សាប៊ូកក់សក់ ចំណុះ 500ml ចំនួន ១០០ កេស, ថ្នាំដុសធ្មេញ ចំណុះ 150ml ចំនួន ១០០ កេស, ធូបមូស ចំនួន ១០០ កេស ដែលគិតជាទឹកប្រាក់សរុបស្មើនឹង ចំនួន ៤១,៨៥០$ មកប្រគល់ជូនអង្គភាព កងរាជអាវុធហត្ថរាជធានីភ្នំពេញ សម្រាប់ជាអំណោយផ្តល់ដល់កងកម្លាំង ក្នុងឱកាសអបអរបុណ្យចូលឆ្នាំថ្មីប្រពៃណីជាតិខ្មែរ ដែលនឹងចូលមកដល់នាពេលខាងមុខនេះ ។

លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានមានប្រសាសន៍ ទទួលស្វាគមន៍ លោក ថន សេងតារា អគ្គនាយកក្រុមហ៊ុនតារា ធីស៊ី ហ្គាស ប្រកបដោយមនោសញ្ចេតនាស្និទ្ធិស្នាលកក់ក្តៅ និងបានសម្តែងនូវ អំណរគុណយ៉ាងជ្រាលជ្រៅ ចំពោះ លោកអគ្គនាយក ដែលតែងតែមានចិត្តសប្បុរសឧបត្ថម្ភអំណោយដល់ អាវុធហត្ថរាជធានីភ្នំពេញ រាល់ពេលមានកម្មវិធីផ្សេងៗកន្លងមក ក៏ដូចជាក្នុងពេលនេះផងដែរ ៕