សន្តិសុខ និង សង្គម
ស្រ្តីម្នាក់រងភាពអយុត្តិធម៌ក្រោយប្តីស្លាប់ ត្រូវបានម្តាយក្មេកបណ្តេញចេញពីផ្ទះរបស់ខ្លួន
ឧត្តរមានជ័យ៖ ស្ត្រីដែលជាអតីតកូនប្រសារម្នាក់ ត្រូវបានម្តាយក្មេកបណ្តេញចេញពីផ្ទះរបស់ខ្លួនក្រោយប្តីបានស្លាប់បាត់បងជីវិតនៅឯស្រុកថៃ បានដង្ហោយដល់អាជ្ញាធរជួយអនុវត្តច្បាប់ ពន្លឿនផ្តល់ភាពយុត្តិធម៌ដល់រូបគាត់ ដើម្បីបានរស់នៅលើដីលំនៅដ្ឋានរបស់ខ្លួនវិញ ស្ថិតនៅភូមិដូនទា ឃុំអំពិល ស្រុកបន្ទាយអំពិល ខេត្តឧត្តរមានជ័យ។
ស្ត្រីរងគ្រោះ ឈ្មោះលិត លាស់ អាយុ៣៧ឆ្នាំ អតីតកូនប្រសារ របស់ឈ្មោះឈឿន រួម អាយុ៧៤ឆ្នាំ ត្រូវជាម្តាយក្មេក រស់នៅភូមិឃុំខាងលើនេះ បានឲ្យដឹងថា កាលពីម្ភៃឆ្នាំមុនរូបគាត់បានរៀបការជាមួយបុរស ឈ្មោះ វៀត ដុង(ប្តី) ម្តាយក្មេកបានចែកដីកេរ្តិ៍ស្រះទឹកមួយកន្លែងឲ្យ ដើម្បីសង់ផ្ទះស្នាក់នៅ និងបានចាក់ដីបំពេញស្រះទឹក រួមទាំងបានទិញដីស្រែមួយចំនួនខ្លះផងដែរ។
ស្ត្រីដដែល បានបន្តថា ដោយមានការខ្វះខាតប្រាក់មួយចំនួនសម្រាប់សង់ផ្ទះ ក៏បានខ្ចីប្រាក់ពីធនាគារចំនួន ១៥ម៉ឺនបាត ដោយដាក់បញ្ចាំប្លង់ដីផ្ទះ និងប្លង់ដីស្រែ (ឈ្មោះប្តីប្រពន្ធ) ខណៈរកប្រាក់បង់មិនបាន អ្នកទាំងពីរក៏សម្រេចចិត្តទៅធ្វើការនៅប្រទេសថៃ និងបានទម្លាក់ប្រាក់សម្រាប់បង់ធនាគារបានចំនួន ៥ម៉ឺនបាត ហើយចំនួនប្រាក់នៅសល់ម្តាយក្មេកបានបង់ផ្តាច់ជំនួសកុំឲ្យខាតការប្រាក់ច្រើន ក៏ឱ្យសាក្សី ដែលបានផ្តិតមេដៃធ្វើជាសាក្សីឱ្យខ្ចីប្រាក់នោះ មកយកប្លង់ដីផ្ទះនិងប្លង់ស្រែរក្សាទុក។
បន្ទាប់ពីប្តីរបស់ខ្លួនស្លាប់នៅស្រុកថៃ រូបគាត់បានត្រឡប់មកស្រុកខ្មែរវិញ ក៏បានសុំទាមទារប្លង់ទាំងនោះមកកាន់កាប់វិញ និងប្រគល់សង់ប្រាក់គ្រប់ចំនួនដល់ម្តាយក្មេកប៉ុន្តែម្តាយក្មេកគាត់មិនព្រមប្រគល់ឱ្យ ដោយនិយាយថា កូនប្រុសគាត់បានស្លាប់ហើយ ស្រ្តីដែលជាកូនប្រសាររូបនេះមិនមានសិទ្ធិរស់នៅកាន់កាប់លើដីផ្ទះ និងដីស្រែនោះទៀតទេ និងបានបណ្តេញចេញពីផ្ទះរហូតដល់បច្ចុប្បន្ននេះផងដែរ។
ដោយភាពអយុត្តិធម៌ ជនរងគ្រោះបានដាក់បណ្តឹងនៅសាលាដំបូងខេត្តឧត្តរមានជ័យអស់រយៈពេលជាច្រើនខែឆ្នាំមកហើយ ប៉ុន្តែនៅមិនទាន់ទទួលបានពន្លឺយុត្តិធម៌ចំពោះរូបគាត់នៅឡើយនោះទេ។
ពាក់ព័ន្ធករណីម្តាយក្មេក និងកូនប្រសារខាងលើនេះ អាជ្ញាធរមូលដ្ឋានភូមិ ឃុំ រហូតដល់ស្រុកបន្ទាយអំពិល បានលើកឡើងប្រហាក់ប្រហែលគ្នា ចំពោះការគាំទ្រភាគីកូនប្រសារ ដោយកន្លងមកអាជ្ញាធរបានធ្វើការសម្របសម្រួលជាច្រើនលើកច្រើនសារតែភាគីខាងម្តាយក្មេកមិនព្រមទទួលយកនូវការសម្របសម្រួលនោះទេ។
ជាមួយគ្នានោះដែរស្រ្តីជនរងគ្រោះបានសំណូមពរ ស្នើឲ្យអាជ្ញាធរខេត្តឧត្តរមានជ័យ ជួយរកយុត្តិធម៌ជូនដល់រូបគាត់ដែលជាស្រ្តីរងគ្រោះនេះផង ដើម្បីចូលរស់នៅក្នុងផ្ទះរបស់ខ្លួនវិញ៕