ព័ត៌មានជាតិ
លោកឧត្តមសេនីយ៍ត្រី បោន ប៊ិន ៖ បេីមានមន្ត្រីយុត្តិធម៌ណា ប្រព្រឹត្តខុសច្បាប់អង្គភាព គឺ គ្មានការ ការពារឡេីយ
បន្ទាយមានជ័យ ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានមានប្រសាសន៍ ដាស់តឿនស្មារតីមន្ត្រីក្រោមឱវាទរបស់លោកថា បេីមានមន្ត្រីយុត្តិធម៌ណា ប្រព្រឹត្តនឹងខុសច្បាប់អង្គភាព គឺ គ្មានការការពារឡេីយ ។
មានប្រសាសន៍ដាស់តឿនដូច្នេះ ក្នុងពិធី បិទវគ្គហ្វឹកហ្វឺន ការពារសន្តិសុខ រក្សាសណ្តាប់ធ្នាប់ ប្រចាំឆមាសទី១ ឆ្នាំ២០២២ ដែលប្រព្រឹត្តទៅនៅនឹងទីបញ្ជាការដ្ឋានកងរាជអាវុធហត្ថខេត្តបន្ទាយមានជ័យ នាថ្ងៃទី១៨ ខែឧសភា ឆ្នាំ២០២២ ។
ក្រៅពីប្រសាសន៍ដាស់តឿនខាងលើ លោកឧត្តមសេនីយ៍ត្រី បោន ប៊ិន ក៏បានថ្លែងនូវអំណរគុណដល់កងកម្លាំងជាសិក្ខាកាម ដែលបានវគ្គហ្វឹកហ្វឺនយ៉ាងយកចិត្តទុកដាក់ ប្រកបដោយឆន្ទៈ រយៈពេលពេញ១ខែកន្លងមកនេះ ។ មួយវិញទៀត ក្នុងនាមកងកម្លាំងត្រូវប្តេជ្ញាការពារសន្តិសុខ ជូនជាតិមាតុភូមិ ការពារសណ្ឋាប់ធ្នាប់ជូនប្រជាពលរដ្ឋឲ្យបានល្អ ត្រូវរួមចិត្តថ្លេីមគ្នា ដេីម្បីសម្រេចនូវកិច្ចការការពារសន្តិសុខជូនជាតិមានតុភូមិ ក្នុងស្មារតីនេះសូមគ្រប់កងកម្លាំងទាំងអស់ត្រូវប្តេជ្ញាធ្វេីឲ្យបាន ។
ក្នុងពិធីនេះដែរលោកវរសេនីយ៍ឯក វ៉ាន់ លីហោ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលផែនហ្វឹកហ្វឺន បានឱ្យដឹងថា មេរៀនដែលយោធាចារ្យ យកមកធ្វើការហ្វឹកហាត់នេះ មានដូចជា ៖ មេរៀនលំហាត់របៀបជួរទ័ព និងមេរៀនការរក្សាសណ្ដាប់ធ្នាប់ ក្នុងនោះមាន ការប្រើប្រាស់ដំបង ខែល និងអាវុធរក្សាសណ្ដាប់ធ្នាប់ ដើម្បីការពារបាតុកម្ម ។ល។ បន្ថែមពីនោះគឺរៀនទ្រឹស្ដី ស្ដីពី បទវិន័យទូទៅសម្រាប់កងយោធពលខេមរភូមិន្ទ ក្រមសីលធម៌ សម្រាប់យោធិន នៃកងយោធពលខេមរភូមិន្ទ នគរបាលជាតិ និងភ្នាក់ងារសន្តិសុខបោះឆ្នោត ក្នុងដំណើរការបោះឆ្នោត និងនីតិវិធីព្រហ្មទណ្ឌ ។
សូមបញ្ជាក់ថា ក្នុងពិធីបិទវគ្គ “ការពារសន្តិសុខ រក្សាសណ្តាប់ធ្នាប់ ប្រចាំឆមាសទី១ ឆ្នាំ២០២២” ក៏មានការសម្តែងនូវមេរៀនសំខាន់ៗ ចំនួន៤មេរៀន ដូចជា ៖ ១-ថ្នាក់កងអនុសេនាធំធ្វេីការរុញច្រានក្រុមបាតុករ និងវាយលុកក្រុមបាតុករ ចាប់យកមេក្លោងបាតុករ ។ ២-សម្ភារៈចាប់ជនបង្ក មានកាំបិត និងដំបង។ ៣-អាវុធហត្ថជិះម៉ូតូដេញចាប់ជនសង្ស័យ។ ៤-បង្ហាញក្បាច់គុណផងដែរ ៕
ដោយ ៖ សម្បត្តិសីហា