ព័ត៌មានជាតិ
ឈ្មួញនាំធ្យូងទៅលក់ឱ្យវៀតណាម តាមច្រករបៀង នៅស្រុកកំចាយមារ យ៉ាងគគ្រឹកគគ្រេងសង្ស័យបើកភ្លើងខៀវពីសមត្ថកិច្ចច្រកទ្វារអន្ដរជាតិម៉ឹងជ័យ
ព្រៃវែង៖ សកម្មភាពឈ្មួញដឹកជញ្ជូនធ្យូងទៅលក់ឱ្យវៀតណាម តាមច្រកទ្វារអន្តរជាតិព្រំដែនម៉ឹងជ័យ ឃុំក្របៅ ស្រុកកំចាយមារ ខេត្ដព្រៃវែង យ៉ាងគគ្រឹកគគ្រេង ទាំងយប់ទាំងថ្ងៃដោយមិនខ្លាចញញើតអ្វីទាំងអស់ សង្ស័យមានការបើកភ្លើងខៀវពីសមត្ថកិច្ចនគរបាលប្រចាំការនៅតំបន់នោះ។
ប្រភពព័ត៌មាន បានឱ្យដឹងថា ការនាំធ្យូងដឹកទាំងយប់ម៉ោង៣ទៅរហូតដល់ម៉ោង៧ព្រឹក គេសង្កេតឃើញមានរយថយន្ដដឹកធ្យូងប្រភេទសាំយ៉ុងកែច្នៃ និងប្រភេទរថយន្តកែច្នៃផ្សេងទៀត បាននាំគ្នាសំរុកដឹកជញ្ជូនធ្យូងចូលទៅទឹកដីប្រទេសវៀតណាម តាមច្រកទ្វារអន្តរជាតិព្រំដែនម៉ឹងជ័យ នៅស្រុកកំចាយមារ ខេត្ដព្រៃវែង ដោយមិនឃើញសមត្ថកិច្ចពាក់ព័ន្ធណាបង្ក្រាបនោះឡើយ។
មន្ដ្រីប្រចាំការ បានលួចខ្សឹបប្រាប់អ្នកសាព័ត៌មានយើងថា រថយន្ដដឹកធ្យូងទាំងអស់នេះមិនមានលក្ខណៈគ្រប់គ្រាន់តាមបច្ចេកទេសច្បាប់ចរាចរណ៍នោះឡើយ ខុសពីរថយន្តដឹកទំនិញផ្សេងៗទៀត ឯមន្ត្រីជំនាញពាក់ព័ន្ធទាំងអស់វិញ មិនហ៊ានត្រួតពិនិត្យឡើយ ព្រោះថាមានអ្នករត់ការផ្លូវគ្រប់ច្រកល្ហកអស់ហើយ។
ពាក់ព័ន្ធព័ត៌មានខាងលើ លោក វ៉ាន់ ពិសិដ្ឋ នាយប៉ុស្តិ៍នបាលអន្តោប្រវេសន៍ច្រកទ្វារអន្តរជាតិម៉ឹនជ័យ បានប្រាប់តាមទូរស័ព្ទ នៅថ្ងៃទី២៣ ខែមិថុនានេះថា នៅលោកគ្មានសេវាទេ៕
