ព័ត៌មានជាតិ
ការដ្ឋានសាងសង់អគារខុនដូក្បែររបងសាលាខណ្ឌទួលគោក ធ្លាក់ដែក បណ្ដាលឱ្យមេការម្នាក់រងរបួសធ្ងន់ និងរថយន្ត៣គ្រឿងរងការខូចខាត
ភ្នំពេញ៖ អគារខុនដូមួយកន្លែង មានយីហោ W ជាប់របងសាលាខណ្ឌទួលគោក ដែលកំពុងសាងសង់បានធ្លាក់ដែកជាច្រើនដើមពីជាលើ បណ្ដាលឱ្យរថយន្តចំនួន ៣គ្រឿងរងការខូចខាត និងមេការម្នាក់ត្រូវចំក្បាលបណ្ដាលឱ្យរងរបួសធ្ងន់ធ្ងរ ។
ហេតុការណ៍នេះ បានកើតឡើង នៅវេលាម៉ោង ១១និង១០នាទី ថ្ងៃទី០៨ ខែសីហា ឆ្នាំ២០២២ នៅចំណុចអគារខុនដូ ស្ថិតនៅជាប់របងសាលាខណ្ឌទួលគោក តាមបណ្ដោយផ្លូវ លេខ៥៩៦ កែងផ្លូវលេខ៣២៩ ភូមិ៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ប្រភពប្រជាពលរដ្ឋ បានឱ្យដឹងថា មិនដឹងជាមូលហេតុអ្វីនោះទេ ស្រាប់តែមានការធ្លាក់ដែក ជាច្រើនដើម ពីលើអគារខុនដូ ជាន់លើបំផុត ធ្លាក់មកក្រោម បណ្ដាលឲ្យត្រូវមេការម្នាក់រងរបួសចំក្បាលធ្ងន់ធ្ងរ រថយន្តរងការខូចខាតចំនួន៣គ្រឿង រួមមាន៖ រថយន្តរបស់ការដ្ឋាន រថយន្តរបស់គណៈបញ្ជាការឯកភាពខណ្ឌទួលគោក និងរបស់ពលរដ្ឋ និងខ្ទាតចូលដល់ក្នុងបរិវេណផ្ទះបងប្អូនប្រជាពលរដ្ឋថែមទៀតផងដែរ។
គួរបញ្ជាក់ថា កន្លងមកទីតាំងខុនដូរនេះ ក៏ធ្លាប់មានបងប្អូនប្រជាពលរដ្ឋ មានការសំណូមពរ និងបានត្អូញត្អែរថា ការដ្ឋានមួយកន្លែងនៅជាប់សាលាខណ្ឌទួលគោក កំពុងសាងសង់ រំលោភលើចិញ្ចើមផ្លូវ បង្កការកកស្ទះ និងខ្វះលក្ខណៈបច្ចេកទេស គ្មានស្ដង់ដារ អាចបង្កហានិភ័យ និងគ្រោះថ្នាក់ដល់ពលរដ្ឋអ្នកធ្វើដំណើរផងដែរ ។
ក្រោយមានការសំណូមពរ នៅព្រឹកថ្ងៃទី១៣ ខែកក្កដា ឆ្នាំ២០២២កន្លងមកនេះ លោក ទៀវ សំអឿន អភិបាលរងខណ្ឌទួលគោក បានដឹកនាំកម្លាំងជំនាញរដ្ឋបាលខណ្ឌចុះត្រួតពិនិត្យ និងធ្វើការអប់រំណែនាំដល់ម្ចាស់គម្រោងសាងសង់ការដ្ឋាន ដើម្បីធ្វើយ៉ាងណាឲ្យមាន សុវត្ថិភាព សណ្ដាប់ធ្នាប់ អនាម័យល្អ និងមិនឲ្យប៉ះពាល់ដល់សណ្ដាប់ធ្នាប់សាធារណៈ៕