នគរបាលស្រុកសំពៅលូនឃាត់ខ្លួនជនសង្ស័យ០២នាក់ជាមុខសញ្ញាឆក់កាបូបតាមដងផ្លូវ
ខេត្តបាត់ដំបង! កម្លាំងផ្នែកជំនាញរួមជាមួយកម្លាំងប៉ុស្តិ៍នគរបាលរដ្ឋបាលសន្តិភាព និងកម្លាំងប៉ុស្តិ៍នគរបាលរដ្ឋបាលជ្រៃសីមា នៃអធិការដ្ឋាននគរបាលស្រុកសំពៅលូន បានធ្វើការស្រាវជ្រាវបង្ក្រាបឃាត់ខ្លួនជនសង្ស័យចំនួន០២នាក់ពីបទអំពើលួចមានស្ថានទម្ងន់ទោស (ឆក់កាបូបប្រាក់)។
កិច្ចប្រតិបត្តិការនេះធ្វើឡើងនៅវេលាម៉ោង១២និង២៥នាទី ថ្ងៃទី២៩ ខែកញ្ញា ឆ្នាំ២០២២ នៅចំណុចក្រុមទី១៤ ភូមិចំបក់ ឃុំជ្រៃសីមា ស្រុកសំពៅលូន ខេត្តបាត់ដំបង ដែលជនសង្ស័យត្រូវបានឃាត់ខ្លួន/ទី១-ឈ្មោះ ជា ដារ៉ូ ភេទប្រុស អាយុ ២៥ឆ្នាំ និងទី២-ឈ្មោះ សន សំរិតភេទប្រុស អាយុ ២៨ឆ្នាំ អ្នកទាំងពីរមានទីលំនៅបច្ចុប្បន្នភូមិចំបក់ ឃុំជ្រៃសីមា ស្រុកសំពៅលូន ខេត្តបាត់ដំបង ជាមួយវត្ថុតាងដកហូតមាន ម៉ូតូម៉ាក វ៉េវអ៊ី ពណ៌ខៀវ ខ្មៅ សេរីឆ្នាំ២០២១ចំនួន០១គ្រឿងពាក់ផ្លាកលេខ បាត់ដំបង 1H-1986 (ក្លែងក្លាយ) ដែលជនសង្ស័យបានជិះធ្វើសកម្មភាព។
ជនសង្ស័យទាំងពីរនាក់ខាងលើបានធ្វើសកម្មភាពជិះម៉ូតូម៉ាកវ៉េវ ពណ៌ខៀវខ្មៅឆក់យកកាបូបដាក់ប្រាក់របស់ជនរងគ្រោះឈ្មោះ រេន ស្រីនាង ភេទស្រី អាយុ២៣ឆ្នាំ មានទីលំនៅភូមិអូរស្ងាត់ ឃុំសន្តិភាព ស្រុកសំពៅលូន ខេត្តបាត់ដំបង ខណៈពេលដែលជនរងគ្រោះកំពុងជិះម៉ូតូនៅលើដងផ្លូវឌុបកូន (ក្មេងតូចៗ) បណ្តាលឱ្យដាច់ខ្សែរ កាបូបនិងដួលម៉ូតូនៅលើផ្លូវ រងរបួស ដាច់រលាត់-ក -ស្មានិងជង្គង់ (របួសស្រាល)តែមិនមានបាត់បង់សម្ភារៈអ្វីនោះទេ ដែលសកម្មភាពនេះកេីតឡេីងកាលពីវេលាម៉ោង ១៩និង៥១នាទី ថ្ងៃទី២៧ ខែកញ្ញា ឆ្នាំ២០២២ នៅចំណុចលើដងផ្លូវជាតិលេខ59A ក្រុមទី០៧ ភូមិគីឡូ១៣ ឃុំសន្តិភាព ស្រុកសំពៅលូនខេត្តបាត់ដំបង។
ក្រោយពីឃាត់ខ្លួនជនសង្ស័យនិងវត្ថុតាងខាងលើត្រូវបាននគរបាលស្រុកសំពៅលូនរៀបចំកសាងសំណុំរឿងដើម្បីបញ្ជូនមកការិយាល័យជំនាញអនុវត្តតាមនីតិវិធីច្បាប់៕
