ព័ត៌មានជាតិ
ឧត្ដមសេនីយ៍ ខេង សុមេធ អញ្ជើញបិទវគ្គហ្វឹកហ្វឺនជំនាញយុទ្ធវិធី ប្រតិបត្តិការ និងសង្គ្រោះបឋម
ព្រះវិហារ៖ ឯកឧត្ដមឧត្ដមសេនីយ៍ ខេង សុមេធ អគ្គស្នងការរងនគរបាលជាតិ នៅថ្ងៃទី៥ ខែតុលា ម្សិលមិញនេះ អញ្ជើញបិទវគ្គហ្វឹកហ្វឺនជំនាញយុទ្ធវិធី ប្រតិបត្តិការ និងសង្គ្រោះបឋម ដល់កងកម្លាំងនគរបាលការពារព្រំដែនគោក–ទឹក និងអន្តរាគមន៍ប្រចាំឆ្នាំ២០២៣ ។
នៅក្នុងពិធីនោះដែរ ឯកឧត្តមនាយឧត្តមសេនីយ៍ ខេង សុមេធ បានពាំនាំការផ្តាំផ្ញើសួរសុខទុក្ខពីសំណាក់ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់សិក្ខាកាមទាំងអស់ និងកម្លាំងទាំងអស់ដែលកំពុងឈរជើងប្រចាំការនៅតាមខ្សែបន្ទាត់ព្រំដែនទិសភូមិភាគទី៤ផងដែរ។
ក្នុងឱកាសនោះ នាយឧត្តមសេនីយ៍ ខេង សុមេធ បានឧបត្ថម្ភថវិកាផ្ទាល់ខ្លួន ជូនដល់សិក្ខាកាមទាំងអស់ដែលបានបញ្ចប់វគ្គសិក្សានេះសរុបចំនួន ៣១៣នាក់ ក្នុងមួយនាក់ ១០ម៉ឺនរៀល ក្រុមគ្រូចំនួន ២៦នាក់ ក្នុងមួយនាក់ ១លានរៀល និងឧបត្ថម្ភថវិកាដល់គ្រូ១នាក់ ដែលប្រពន្ធទើបទទួលមរណភាព ចំនួន ២លានរៀល សរុបថវិកាចំនួន ៥៩.៣០០.០០០ រៀល៕
