អាវុធហត្ថខេត្តបាត់ដំបង ឃាត់ខ្លួនជនសង្ស័យ០១នាក់ពីបទ ជួញដូរដោយខុសច្បាប់នូវសារធាតុញៀន

បាត់ដំបង ៖ យោងតាមបទបញ្ជារបស់លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង នៅវេលាម៉ោង២០ និង០០នាទី ថ្ងៃទី០៤ ខែមីនា ឆ្នាំ២០២៤ លោកវរសេនីយ៍ទោ សូ ឌី ប្រធានមន្ទីរស្រាវជ្រាវ និងបង្ក្រាបបទល្មើស បានធ្វើការបង្ក្រាបករណីជួញដូរដោយខុសច្បាប់នូវសារធាតុញៀនមួយករណីក្នុងបទល្មើសជាក់ស្តែង។

កិច្ចប្រតិបត្តិការខាងលើនេះធ្វើឡើងនៅចំណុចបន្ទប់ជួលមួយកន្លែង ស្ថិតក្នុងភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ដោយបានឃាត់ខ្លួនជនសង្ស័យម្នាក់ ឈ្មោះ អួន រក្សា ហៅ លាន ភេទប្រុស អាយុ២២ឆ្នាំ មុខរបរមិនពិតប្រាកដ រស់នៅភូមិអង់ សង្កាត់អូរចារ ក្រុងបាត់ដំបង ជាមួយវត្ថុតាងរួមមាន ៖ គ្រឿងញៀនប្រភេទ( ម៉ាទឹកកក ) ចំនួន ០៤កញ្ចប់ ទម្ងន់៣.៦៧ ក្រាម, ទូរស័ព្ទដៃចំនួន ០១គ្រឿង, និងឧបករណ៍ប្រើប្រាស់គ្រឿងញៀនមួយចំនួន និងម៉ូតូចំនួន ០១គ្រឿង។

ក្រោយពីឃាត់ខ្លួន បច្ចុប្បន្នជនសង្ស័យនិងវត្ថុតាងកំពុងឃាត់ខ្លួន និងរក្សាទុកនៅការិយាល័យជំនាញដើម្បីចាត់ការបន្តនីតិវិធី ៕
ដោយ ៖ សាលី