មន្រ្ដីលេខាធិការដ្ឋានគណៈកម្មការថ្លឹងរថយន្តចល័ត ចុះត្រួតពិនិត្យនៅផ្លូវជាតិលេខ៥ ស្រុក មង្គលបូរី
បន្ទាយមានជ័យ៖ ព្រឹកថ្ងៃទី១៧ខែកុម្ភៈ ឆ្នាំ២០២២ ក្រុមមន្ត្រីលេខាធិការខាងគណៈកម្មាធិការ ចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នៅកំណាត់ផ្លូវជាតិលេខ៥ ក្នុងភូមិសាស្ត្រស្រុកមង្គលបុរី ។
លោក តាំង ពៅ ប្រធានលេខាធិការដ្ឋានសហការជាមួយមន្ទីរសាធារណការ និងដឹកជញ្ជូនខេត្តបន្ទាយមានជ័យ បានធ្វើការចុះឃាត់យានយន្តដឹកជញ្ជូនធុនធ្ងន់ជាច្រើនគ្រឿង ដើម្បីធ្វើការត្រួតពិនិត្យ និងធ្វើការថ្លឹងចល័ត ឬអ្នកដឹកលើសទម្ងន់ កំណត់ផាកពិន័យតាមច្បាប់ជាក់ស្ដែង ក្នុងការត្រួកពិនិត្យលើយានយន្តទាំងអស់ឃើញថា មានរថយន្តមួយចំនួនដឹកលើសកម្រិតកំណត់ គឺប្រភេទរថយន្តដឹកខ្សាច់។
លោក សុក ចាន់ថា ជាប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យ បានបញ្ជាក់ថា កន្លងមកគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានពិនិត្យឃើញថា ម្ចាស់ក្រុមហ៊ុនដឹកជញ្ជូនម្ចាស់រថយន្តធុនធ្ងន់និងអ្នកបើកបររថយន្តធុនធ្ងន់បានចូលរួម គោរពបទប្បញ្ញត្តិច្បាប់ និងលិខិតបទដ្ឋានគតិយុត្តិបានល្អប្រសើរ។
តាមរយៈការផ្សព្វផ្សាយអប់រំណែនាំ និងចាត់វិធានការ តាមបទបញ្ជានៃច្បាប់ ប៉ុន្តែក៏នៅមានម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ មួយចំនួននៅតែពុំទាន់ចូលរួមគោរពអនុវត្តច្បាប់និងលិខិតបទដ្ឋានគតិយុត្តិឲ្យបានពេញលេញនិងត្រឹមត្រូវនៅឡើយទេ។ ដូចនេះ ដើម្បីពង្រឹងការអនុវត្តនូវបទបញ្ញត្តិនៃច្បាប់ស្ដីពីផ្លូវថ្នល់ និងលិខិតបទដ្ឋានគតិយុត្តិពាក់ព័ន្ធឲ្យកាន់តែមានប្រសិទ្ធភាពខ្ពស់ ក្នុងការ ការពារហេដ្ឋា រចនាសម្ព័ន្ធផ្លូវថ្នល់ស្ពាន និងសំណង់សិល្បការ ផ្លូវថ្នល់ឲ្យបានជាប់រឹងមាំគង់វង្ស និងធន់ជាប់តាមអាយុកាលបច្ចេកទេសសាងសង់៕