គណៈគ្រប់គ្រងសាលាបឋមសិក្សាវត្តលៀប បានធ្វើពិធីចែកប័ណ្ណសសើរ និងរង្វាន់លើកទឹកចិត្តដល់សិស្សក្រីក្រនិងពូកែ

(បាត់ដំបង)! កាលពីព្រឹកថ្ងៃទី១១ ខែវិច្ឆិកា ឆ្នាំ២០២៣ សាលាបឋមសិក្សាវត្តលៀប ស្ថិតក្នុងភូមិវត្តលៀប សង្កាត់ចំការសំរោង ក្រុងបាត់ដំបង បានធ្វើពិធីចែកប័ណ្ណសសើរ និងរង្វាន់លើកទឹកចិត្តដល់សិស្សក្រីក្រនិងពូកែ ក្រោមអធិបតីភាព ព្រះយសបាលកោសល គឹម សៀង ចៅអធិការវត្តវិភទ្ទសច្ចារាម(ហៅវត្តលៀប) លោក កុក ហាន ចៅសង្កាត់ចំការសំរោង និងសប្បុរសជន មានលោកជំទាវ ប៊ន់លី ពៅចិន្តា ផងដែរ។

នាឱកាសនោះ បន្ទាប់ពីលោកស្រី អ៊ុន កែវនិមិត នាយិការសាលាបឋមសិក្សាវត្តលៀប បានលើកមានមតិស្វាគមន៍និងរបាយការណ៍សង្ខេបអំពីលទ្ធផលដំណាច់ឆ្នាំ ជូនគណៈអធិបតីរួចមក ព្រះយសបាលកោសល គឹម សៀង ចៅអធិការវត្តវិភទ្ទសច្ចារាម(ហៅវត្តលៀប) បានមានសង្ឃដិកាសំណេះសំណាលថា ការអប់រំពិតជាមានសារៈសំខាន់ខ្លាំងណាស់នៅក្នុងបច្ចុប្បន្នសំរាប់មនុស្សទាំងអស់គ្នា ពិសេសគឺកុមាតូចៗដែលជាទំពាំង ដែលជាធនធានដ៏ល្អសម្រាប់ប្រទេសរបស់យើងទៅថ្ងៃអនាគត និងជាធនធានដែលយើងមិនអាចបំភ្លេចបាន។

ព្រះអង្គមានសង្ឃដិកាទៀតថា ការអប់រំលើកូនចៅប្រុសស្រីតូចៗ យើងមិនផ្តោតសំខាន់ទៅលើតែការបញ្ជូនកូនទៅសាលារៀនតែមួយមុខនោះទេ ឪពុកម្តាយត្រូវចូលរួមអប់រំទៅលើកូនៗផងដែរ យើងមិនត្រូវរំពឹងតែលើលោកគ្រូ អ្នកគ្រូ តែមួយមុខនោះទេ ឪពុកមា្តយទាំងអស់គ្នាក៏ត្រូវចូលរួមអប់រំបន្តនៅគេហដ្ឋានរបស់យើងផងដែរ ព្រោះបើសិនជាការអប់រំឪពុកម្តាយសង្ឃឹមតែបញ្ជូនកូនមកសាលារៀនតែមួយមុខ ហើយការអប់រំរបស់ឪពុកម្តាយអត់មាន នេះជាហានិភ័យនិងជាគម្លាតពីឪពុកម្តាយនិងកូន ដូច្នេះឪពុកម្តាយត្រូវដើរអោយជាប់ជាមួយសាលា ជាមួយលោកគ្រូ អ្នកគ្រូ បើយើងគិតតែពីផលប្រយោជន៍មួយក្តាប់តូចពីការរកស៊ីចិញ្ចឹមជីវិត ធ្វើស្រែ ធ្វើចំការ ដោយមិនគិតពីការសិក្សារបស់កូន យើងមិនអាចដឹងថាកូនយើងទៅសាលា ទៅសិក្សាពិតដែរឬអត់ ។

បន្ថែមពីនេះ លោក កុក ហាន ចៅសង្កាត់ចំការសំរោង ក៏បានមានចំណាប់អារម្មណ៍ដោយជំរុញអោយសិស្សានុសិស្សទាំងអស់អោយស្រលាញ់និងខិតខំសិក្សារៀនសូត្រដើម្បីអោយក្លាយជាក្មេងជាអ្នកបន្តវេន ហើយក៏សូមថ្លែងអំណគុណចំពោះអ្នកដែលមានសប្បុរសជន មនុស្សធម៌ដែលជួយឧបត្ថម្ភរាល់កម្មពិធីសាលាដែលមានចែករង្វាន់ដល់សិស្សចាប់ពីថ្នាក់ទី០១ដល់ថ្នាក់ទី០៥ ហើយក្នុងនាមជាចៅសង្កាត់ក៏សូមថ្លែងអំណរគុណដល់សប្បុរសជនទាំងអស់ដែលមានការសហការចូលរួមជាមួយលោកគ្រូ អ្នកគ្រូ រហូតធ្វើអោយសាលាមានការរីកចំរើន ផ្លែកពីមួយឆ្នាំទៅមួយឆ្នាំគួរអោយគាត់សំគាល់។

CATEGORIES
Share This