ព័ត៌មានជាតិ
បញ្ចុះបឋមសិលា សាងសង់សាលាឆាន់ថ្មីមួយខ្នង នៅវត្តព្រះពន្លា ក្រុងសិរីសោភ័ណ គ្រោងការចំណាយប្រមាណមួយលានដុល្លារ
បន្ទាយមានជ័យ ៖ សាលាឆាន់ថ្មីមួយខ្នង នៅវត្តរាជនិវេសនារាមព្រះពន្លា ស្ថិតនៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ដែលគ្រោងការចំណាយប្រមាណមួយលានដុល្លារ ត្រូវបានបញ្ចុះបឋមសិលាសាងសង់ហេីយ ក្រោមអធិបតីភាពលោកជំទាវឧកញ៉ា អគ្គមហាឧបាសិកា ពុទ្ធសាសនូបត្ថម្ភន៍ បណ្ឌិត ម៉ៅ ម៉ាល័យ កែគឹមយ៉ាន ប្រធានកត្តិយសសមាគមនារីកម្ពុជា ដេីម្បីសន្តិភាព និងអភិវឌ្ឍន៍ខេត្តបន្ទាយមានជ័យ ដោយមានការចូលរួមពីសំណាក់លោក ហ៊ឹល រ៉ាយ៉ា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងមានការចូលរួមពីសំណាក់មន្ត្រីសង្ឃ ពុទ្ធបរិស័ទជិតឆ្ងាយបានចូលរួម ប្រារព្ធនៅរសៀលថ្ងៃទី២៥ ខែមិថុនា ឆ្នាំ២០២៣ ។
ព្រះគ្រូចៅអធិការវត្តព្រះពន្លា យឿន សាមឿត ដោយមានការស្រុះស្រួលមូលមតិគ្នាជាឯកច្ឆ័ន្ទពីពុទ្ធបរិស័ទ គណៈកម្មការ អាចារ្យវត្ត ដេីម្បីកសាងសាលាឆាន់ថ្មី រចនាប័ទ្មខ្មែរ មានបណ្ដោយ ៣៩ម៉ែត្រ ទទឹង២៩ម៉ែត្រ ដែលត្រូវបញ្ចុះបឋមសិលាសាងសង់នេះ ដេីម្បីឱ្យបងប្អូនប្រជាពុទ្ធបរិស័ទ បានប្រារព្ធធ្វេីបុណ្យទាននានា តាមបែបព្រះពុទ្ធសាសនា។
ទន្ទឹមជាមួយគ្នានោះព្រះគ្រូចៅអធិការវត្ត ក៏បានអំពាវនាវដល់សប្បុរសជនក្នុង និងក្រៅប្រទេស ពុទ្ធបរិស័ទជិតឆ្ងាយ ចូលរួមជួយតាមសទ្ធាជ្រះថ្លាក្នុងការកសាងសាលាឆាន់ថ្មីនេះ ដោយវត្តមានការខ្វះខាតដូចជា ស៊ីម៉ង់ត៍ ឥដ្ឋ ថ្ម ខ្សាច់ ដែក និងគ្រឿងសម្ភារៈសម្រាប់កសាងជាដេីម ។
ព្រះគ្រូចៅអធិការវត្ត យឿន សាមឿត មានសង្ឃដីកាបញ្ជាក់ថា ៖ វត្តរាជនិវេសនារាមព្រះពន្លាមុនឆ្នាំ១៩៧៥ ព្រះចៅអធិការ អាចារ្យ គណៈកម្មការ ចាស់ទុំព្រឹទ្ធាចារ្យ កសាងបាននូវ រោងឧបោសថ សាលាធម្មសភា សាលាធម្មវិន័យ កុដិព្រះសង្ឃ បានប្រើប្រាស់ជាប្រយោជន៍ ព្រះពុទ្ធសាសនានាសម័យមុន ។ លុះចាប់ពីឆ្នាំ ១៩៧៩ ព្រះចៅអធិការ អាចារ្យ គណៈកម្មការ ពុទ្ធបរិស័ទកសាងព្រះវិហារ ជួសជុលសាលាធម្មសភា កសាងសាលាបាលី កុដិ កសាងរបងវត្ត ៕
