តំណាងរាស្ត្រមណ្ឌលប៉ៃលិន បន្តចុះសំណេះសំណាល ជាមួយសមាជិកបក្ស ជាង៤០០នាក់

ប៉ៃលិន ៖ ព្រឹកថ្ងៃទី០៣ ខែកក្កដា ឆ្នាំ២០២៣ ឯកឧត្តម អ៊ី ឈាន ប្រធានក្រុមការងារគណបក្សប្រជាជន កម្ពុជា ចុះជួយខេត្ត និងជាបេក្ខជនតំណាងរាស្ត្រពេញសិទ្ធិរបស់គណបក្សប្រជាជនកម្ពុជា នៅមណ្ឌលប៉ៃលិន បានដឹកនាំក្រុម ការងារអញ្ជើញចុះជួបសំណេះសំណាលសួរសុខទុក្ខ និងផ្សព្វផ្សាយពីគោល នយោបាយ របស់គណបក្ស ដល់សមាជិក សមាជិការបក្ស ចំនួនជាង ៤០០នាក់ នៅសង្កាត់ទួលល្វា ក្រុងប៉ៃលិន  ដែលជាថ្ងៃទី០៣ នៃយុទ្ធនាការឃោសនា បោះ ឆ្នោត ជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ។

ឯកឧត្តម អ៊ី ឈាន បានមានប្រសាសន៍លើកឡើង ពីសមិទ្ធផលជាប្រវត្តិសាស្ត្រ ដែលសម្រេចបាន ក្រោម ការដឹកនាំរបស់រាជរដ្ឋាភិបាល ដែលប្រសូត្រចេញពីគណបក្ស ប្រជាជនកម្ពុជា ដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រី បានសម្រេចជោគជ័យយ៉ាងធំធេងនៅក្នុង បុព្វហេតុ កសាង និងការពារមាតុភូមិ ហើយបាននិងកំពុងធ្វើដំណើរទៅមុខយ៉ាងស្វាហាប់ឆ្ពោះទៅរកអនាគតដ៏ភ្លឺស្វាង ។

ឯកឧត្តមប្រធាន បានមានប្រសាសន៍បញ្ជាក់ថា កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ ពីសមរភូមិនៃសង្គ្រាមដ៏រ៉ាំរ៉ៃ ពីការបែកបាក់ជាតិ និងការបែងចែកទឹកដី និងពីទឹកដី ដែលខឿនសេដ្ឋកិច្ចជាតិ ត្រូវបំផ្លាញ ខ្ទេចខ្ទីជាគំនរផេះផង់ ទៅជាទឹកដីដែលមានសន្តិភាព សាមគ្គីភាព សេរីភាព ប្រជាធិបតេយ្យ នីតិរដ្ឋ និងអភិវឌ្ឍន៍លើ គ្រប់ វិស័យ ដែលធ្វើឱ្យប្រជាជនគ្រប់រូបបានរស់នៅយ៉ាងសុខសាន្តក្រោមដំបូលរដ្ឋធម្មនុញ្ញ និងម្លប់ដ៏ត្រជាក់នៃអង្គ ព្រះមហាក្សត្រ ជាទីសក្ការៈដ៏ខ្ពង់ខ្ពស់បំផុត ហើយនេះជាប្រវត្តិសាស្ត្រដ៏ថ្លៃថ្លាដែលគណបក្សប្រជាជន បានកសាងឡើង ក្នុង ស្មារតី នៃភាពជាម្ចាស់ ដោយឆន្ទៈឯកភាព និងប្តូរផ្តាច់ នៅក្នុងដំណើរដ៏បត់បែនរបស់ប្រជាជាតិរយៈពេលជាង ៥ ទសវត្សរ៍ ចុងក្រោយនេះ ។

ឯកឧត្តមបន្តថា ដោយឈរលើមូលដ្ឋានសច្ចធម៌នេះ ប្រជាជនកម្ពុជាបានយល់ យ៉ាងច្បាស់ថា គណបក្សប្រជាជនកម្ពុជា ជាកម្លាំងដឹកនាំប្រទេសជាតិដែលពុំអាចខ្វះបាន ទាំងពេលបច្ចុប្បន្ន ក៏ដូចតទៅ មុខយូរអង្វែង ហើយបានផ្ដល់យុត្តិធម៌ដល់គណបក្សតាមរយៈការបោះឆ្នោតគាំទ្រយ៉ាងច្រើនលើសលប់ ទាំងការបោះឆ្នោត ថ្នាក់ជាតិ ក៏ដូចថ្នាក់ក្រោមជាតិ និងការចូលរួមយ៉ាងសកម្មក្នុងការអនុវត្តកម្មវិធីនយោបាយរបស់គណបក្ស ដូចនេះ សូម អំពាវ នាវដល់សមាជិក-សមាជិកា និងប្រជានជនកម្ពុជាទាំងអស់ បន្តបោះឆ្នោតជូនគណបក្សប្រជាជនកម្ពុជា ដែលមាន លេខរៀងទី១៨ នៅក្នុងសន្លឹកឆ្នោត ពិសេសគាំទ្របេក្ខភាពឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋ មន្ត្រីនាពេល អនាគត ។

សូមបញ្ជាក់ថា  ក្នុងកម្មវិធីឃោសនារកសម្លេងឆ្នោតនោះដែរ ក្រុមការងារក៍បានបង្រៀនសមាជិក សមាជិកា អំពីការគូសសន្លឹកឆ្នោតដែលត្រឹមត្រូវ ដែលមានរូបទេវតាបាចផ្កាជាសម្គាល់ ដើម្បីបានបញ្ចេញនូវឆន្ទះ ក្នុងការគាំទ្រគណបក្សប្រជាជនកម្ពុជា ឱ្យទទួលជ័យ ជំនះរាល់ការបោះឆ្នោត គ្រប់ៗអណត្តិ ៕