ព័ត៌មានជាតិ
សមត្ថកិច្ច នាំខ្លួនជនសង្ស័យ០២នាក់ ពីបទលួចមានស្ថានទម្ងន់ទោស
បាត់ដំបង ៖ កម្លាំងក្រុមអន្តរាគមន៍ បង្ការបង្ក្រាប បានសហការជាមួយកម្លាំងអធិការដ្ឋាននគរបាលក្រុងបាត់ដំបង ដែលដឹកនាំដោយលោក វរសេនីយ៍ឯក ពេជ្រ សារ៉ែន ជាអធិការ ចុះប្រតិបត្តិការបង្ក្រាបករណីលួចមានស្ថានទម្ងន់ទោស ( ធាក់បំបាក់យកស្លាកលេខម៉ូតូ )០១ ករណី និងបានធ្វេីការនាំខ្លួនជនសង្ស័យ ចំនួន០២នាក់ ។
កិច្ចប្រតិបត្តិការខាងលើនេះ ធ្វើឡើងនៅវេលាម៉ោង ២០និង៤០នាទី ថ្ងៃទី១៨ ខែកក្កដា ឆ្នាំ២០២៣ នៅចំណុចបន្ទប់ជួលស្ថិតក្នុងភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង តាមការណែនាំបញ្ជាផ្ទាល់ពី ឯកឧត្ដម ឧត្តមសេនីយ៍ទោ សាត គឹមសាន ស្នងការខេត្តបាត់ដំបង ក៏ដូចជាលោក ឧត្តមសេនីយ៍ត្រី លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ លោក វរសេនីយ៍ឯក ឈឿង គឹមសុង ស្នងការរង ដឹកនាំការិយាល័យនគរបាលព្រហ្មទណ្ឌកម្រិតស្រាល លោក វរសេនីយ៍ឯក ចៀក ថានិន នាយការរិយាល័យនគរបាលព្រហ្មទណ្ឌកម្រិតស្រាល ព្រមទាំងមានការសម្របសម្រួលទៅលេីនីតិវិធីពី ឯកឧត្ដម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបងផងដែរ ។
ជនសង្ស័យត្រូវបានឃាត់ខ្លួន ១-ឈ្មោះ អ៊ន សំអាត ហៅ រ៉ា ភេទប្រុស អាយុ១៧ ឆ្នាំ មានទីលំនៅភូមិវត្តចែង ឃុំអូរដំបង១ ស្រុកសង្កែ ខេត្តបាត់ដំបង ។ ២- ឈ្មោះ អឿត សុជីត ភេទប្រុស អាយុ ១៦ឆ្នាំ មានទីលំនៅភូមិកំពង់ពិល ឃុំវត្តតាមិម ស្រុកសង្កែ ខេត្តបាត់ដំបង ជាមួយវត្ថុតាងដកហូតរួមមាន ៖ ម៉ូតូ ០១ គ្រឿង ម៉ាកហុងដាឌ្រីម សេ ១២៥ ពណ៌ខ្មៅ ស៊េរីឆ្នាំ២០២២ ពាក់ស្លាកលេខ បាត់ដំបង 1AO-9658, ស្លាកលេខម៉ូតូ ០១ សន្លឹក ( បាត់ដំបង 1S-9145 ) ជាស្លាកលេខរបស់ម៉ូតូជនរងគ្រោះ ។
គួរបញ្ជាក់ថា កាលពីថ្ងៃទី១៣ ខែកក្កដា ឆ្នាំ២០២៣ វេលាម៉ោងប្រហែល ០២និង៣០នាទី នៅចំណុចក្រុមទី២៦ ភូមិកំពង់ក្របី សង្កាត់ស្វាយប៉ោ ក្រុងបាត់ដំបង ជនសង្ស័យទាំង០២នាក់ ខាងលើ រួមជាមួយបក្សពួកមានគ្នាចំនួន ១៤ នាក់ទៀត ( ដែលកំពុងរត់គេចខ្លួន ) បានជិះម៉ូតូចំនួន០៧គ្រឿង ធ្វេីសកម្មភាព គប់ដុំថ្ម និងធាក់បំបាក់យកស្លាកលេខម៉ូតូ របស់ជនរងគ្រោះ ឈ្មោះ ចក់ សាន្ត ហៅ ង៉ា ភេទប្រុស អាយុ ២៦ឆ្នាំ មានទីលំនៅភូមិកំពង់ឆ្លង ឃុំឈេីទាល ស្រុកបាណន់ ខេត្តបាត់ដំបង ។ ក្រោយពីធ្វេីសកម្មភាពរួចក្រុមជនសង្ស័យខាងលេី បានជិះម៉ូតូរត់គេចខ្លួនបាត់អស់ រហូតមកដល់ថ្ងៃខែខាងលេី ទេីបកម្លាំងយេីងធ្វេីការឃាត់ខ្លួនបាន ចំនួន ០២នាក់ ហើយបច្ចុប្បន្នការិយាល័យជំនាញកំពុងធ្វេីការកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ៕
ដោយ ៖ សាលី
