ព័ត៌មានជាតិ
បន្ទាយមានជ័យ ៖ ចាស់ជរា ស្ត្រីមេម៉ាយ ស្ត្រីមានផ្ទៃពោះ-កូនខ្ចី ស្ត្រីមានសតិមិនប្រក្រតី ១៥គ្រួសារ នៅរសៀលថ្ងៃទី១១ ខែមិថុនា ឆ្នាំ២០២៣ បានទទួលអំណោយ ពីសមាគមនារីកម្ពុជាខេត្តបន្ទាយមានជ័យ ។
ការនាំអំណោយនេះ ក្រោមការដឹកនារបស់លោកជំទាវ ជ័យ ណារី អ៊ុំរាត្រី អនុប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍខេត្តបន្ទាយមានជ័យ អមដំណើរដោយលោកស្រី រស់ សុផានី អភិបាលរងខេត្ត និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍខេត្តបន្ទាយមានជ័យ ព្រមទាំងក្រុមការងារនារីខេត្ត និងមានការចូលរួមពីលោក អែម សុខា អភិបាលស្រុកថ្មពួក ។
លោក អែម សុខា អភិបាលស្រុកថ្មពួក មានប្រសាសន៍ថា ជំនួសមុខឲ្យប្រជាពលរដ្ឋ សូមថ្លែងអំណរគុណចំពោះសមាគមនារីកម្ពុជាខេត្ត ដែលមានលោកជំទាវហេមចិត្តា អគ្គមហាឧបាសិកាពុទ្ធសាសនូបត្ថម្ភន៍ បណ្ឌិត ម៉ៅ ម៉ាល័យ កែគឹមយ៉ាន ប្រធានកត្តិយសសមាគមនារីកម្ពុជា ដេីម្បីសន្តិភាព និងអភិវឌ្ឍន៍ខេត្តបន្ទាយមានជ័យ តែងតែចាត់ក្រុមការងារចុះជួយពលរដ្ឋដែលមានជីវភាពខ្វះខាត ជាក់ស្តែងពលរដ្ឋទាំងប៉ុន្មានគ្រួសារ មានជីវភាពលំបាក។ ជាពិសេសប្រុខរាជរដ្ឋាភិបាលក្រោមការដឹកនាំដោយសម្តេចតេជោ ហ៊ុន សែន តែងតែនាំក្បែរពលរដ្ឋជានិច្ច ទោះក្នុងកាលៈ ទេសៈណាក៏ដោយមិនដែលទុកបងប្អូនចោលឡេីយ។
មានប្រសាសន៍នាឱកាសនោះលោកជំទាវ ជ័យ ណារី អ៊ុំរាត្រី ក៏បានពាំនាំប្រសាសន៍ផ្ដាំផ្ញើសាកសួរសុខទុក្ខពីសំណាក់លោកជំទាវ ហេមចិន្តា អគ្គមហាឧបាសិកាពុទ្ធសាន៍នូបត្ថម្ភ បណ្ឌិត ម៉ៅ ម៉ាល័យ កែគឹមយ៉ាន ជូនចំពោះបងប្អូនស្ត្រីដែលក្ដីនឹករលឹក ។
ទន្ទឹមជាមួយគ្នានោះ លោកជំទាវ ក៏បានអំពាវនាវដល់បងប្អូនប្រជាពលរដ្ឋ សូមទៅចូលរួមបោះឆ្នោតទាំងអស់គ្នានៅថ្ងៃទី២៣ ខែកក្កដា ឆ្នាំ២០២៣នាពេលខាងមុខ ដើម្បីជ្រើសរើសថ្នាក់ដឹកនាំដែលខ្លួនពេញចិត្ត ដើម្បីដឹកនាំប្រទេសកម្ពុជា ឱ្យកាន់តែមានភាពរីកចម្រើនអភិវឌ្ឍទៅមុខជាលំដាប់ ។
ចំពោះអំណោយពលរដ្ឋចាស់ជរា ស្រ្តីម៉េម៉ាយ ៧គ្រួសារ ក្នុងមួយគ្រួសារ ទទួលបានអង្ករ២០គីឡូក្រាម, មីមួយកេស, ទឹកសុទ្ធវីតាល់មួយកេស គ្រឿងឧបភោគបរិភោគមួយចំនួន សារុងមួយ អាវកីឡាមួយ រួមនឹងថវិកាចំនួន២០ម៉ឺនរៀល ។ ស្ត្រីមានផ្ទៃពោះ កូនខ្ចី កូនភ្លោះ ស្ត្រីមានសតិមិនប្រក្រតី ចំនួន៨នាក់ ក្នុងម្នាក់ទទួលបាន ឃីតមួយ, សារុងមួយ, អាវកីឡាមួយ រួមនឹងថវិកាម្នាក់ចំនួន៥ម៉ឺនរៀល។ ក្នុងនោះយុវជនដែលបានចូលរួមក្នុងម្នាក់ ទទួលបានសារុងមួយ, អាវកីឡាមួយផងដែរ ៕