ព័ត៌មានជាតិ
រថយន្ត០២គ្រឿង បុកគ្នាហោះទៅប៉ះម៉ូតូ០៣គ្រឿង បណ្តាលអោយមនុស្សច្រើននាក់ រងរបួសធ្ងន់ស្រាល
បាត់ដំបង ៖ រថយន្តពីរគ្គ្រឿងបុកគ្នាពេញទំហឹង ហោះទៅបុកម៉ូតូ០៣គ្រឿងផ្សេងទៀត បណ្ដាលឲ្យមនុស្សជាច្រើននាក់ រងរបួសធ្ងន់ស្រាល នៅវេលាម៉ោងប្រមាណ៧និង០០នាទី ថ្ងៃទី១២ ខែមិថុនា ឆ្នាំ២០២៣ ស្ថិតនៅក្នុងភូមិបឹងរាំង សង្កាត់អូរម៉ាល់ ក្រុងបាត់ដំបង ។
ប្រភពនៅកន្លែងកើតហេតុនបានប្រាប់ថា ករណីគ្រោះថ្នាក់ចរាចរដ៏រន្ធត់ខាងលើនេះ ដំបូងឡើយ គេឃើញរថយន្តមួយគ្រឿងម៉ាក TOYOTA ពណ៌ស ពាក់ស្លាកលេខ ឧ.មានជ័យ 2C-9898 បើកបរដោយបុរសម្នាក់ ធ្វើដំណើរតាមបណ្តោយផ្លួវហាយវេ ទិសដៅពីត្បូងទៅជើង លុះមកដល់ចំណុចកើតហេតុខាងលើ(ផ្លូវបំបែកជាបួន) ក៏ស្រាប់តែមានរថយន្តម៉ាក NISSAN ពណ៌ស មួយគ្រឿង ពាក់ស្លាកលេខភ្នំពេញ 2V-3037 ធ្វើដំណើរពីលិចទៅកើត (កាត់ទទឹង)បើកឆ្លងផុតចំណុចកណ្ដាលទៅហើយ ក៏ត្រូវរថយន្តTOYOTA បុកពេញទំហឹង ចំពីចំហៀងផ្នែកខាងមុខ រហូតធ្វើឲ្យរថយន្តNISSAN វិលត្រឡប់បែរក្រោយ ហើយរថយន្តTOYOTA ជ្រុលទៅបុករះម៉ូតូ០៣គ្រឿងទៀត ដែលឈប់រង់ចាំឆ្លងថ្នល់ បណ្ដាលឲ្យមនុស្សជាច្រើននាក់រងរបួសធ្ងន់ និងស្រាល តែម្តង ។
ក្រោយពេលកើតហេតុ សមត្ថកិច្ចជំនាញបានចុះទៅវាស់វែង ធ្វើកំណត់ហេតុយករថយន្តទាំង០២គ្រឿង និងម៉ូតូ០៣គ្រឿង របស់ជនរងគ្រោះទៅកាន់ការិយាល័យចរាចរណ៍ខេត្ត ដើម្បីរង់ចាំដោះស្រាយតាមផ្លូវច្បាប់ ដោយឡែកជនរងគ្រោះត្រូវបានបញ្ជូនទៅកាន់មន្ទីរពេទ្យ ៕
ដោយ ៖ សាលី
