ព័ត៌មានជាតិ
ពលករខ្មែរ ៧៣នាក់ ត្រឡប់ពីប្រទេសថៃមកកម្ពុជាវិញ តាមច្រករបៀង ក្នុងភូមិសាស្ត្រខេត្តបន្ទាយមានជ័យ
បន្ទាយមានជ័យ ៖ ក្នុងរយៈពេល១ថ្ងៃ ថ្ងៃទី១៣ ខែមីនា ឆ្នាំ២០២២ មានពលករខ្មែរប្រុសស្រី ចំនួន៧៣នាក់ បានត្រឡប់ពីប្រទេសថៃ មកកម្ពុជាវិញ តាមច្រករបៀង ក្នុងភូមិសាស្ត្រខេត្តបន្ទាយមានជ័យ ។
សមត្ថកិច្ច បានឲ្យដឹងថា ករណីទី១ នៅវេលាម៉ោង១០ និង១៥នាទី ថ្ងៃទី១៣ ខែមីនា ឆ្នាំ២០២២ មានប្រជាពលរដ្ឋចំនួន ១០នាក់ ក្នុងនោះស្រី០៦នាក់ និងកុមារ០១នាក់ បានវិលត្រឡប់ពីប្រទេសថៃ មកកម្ពុជា តាមភូមិសាស្ត្រប៉ុស្តិ៍សង្កែ (ចំណុចកំពង់បងសល់) ពួកគេមានទីលំនៅក្នុងខេត្តចំនួន ០២ គឺ បាត់ដំបង ចំនួន០៧នាក់ និងព្រៃវែង ចំនួន០៣នាក់ ។ បន្ទាប់ពីធ្វើការណែនាំ ស្ដីពី ការឆ្លងរាលដាលនៃ ជំងឺកូវីដ១៩ រួចមក កម្លាំងប៉ុស្តិ៍សង្កែ សហការជាមួយកម្លាំងប៉ុស្ដិ៍រដ្ឋបាលឃុំបឹងបេង និង កម្លាំងកងពល៥១ បានប្រគល់ពួកគាត់ ជូនរថយន្តពេទ្យ ដឹកទៅមណ្ឌលសំចតប៉ុស្តិ៍ចំបក់ ។ ករណីទី២ នៅវេលាម៉ោង ១១ ថ្ងៃត្រង់ថ្ងៃទី១៣ ខែមីនា ឆ្នាំ២០២២ មានពលករខ្មែរ ចំនួន ៦៣នាក់ ក្នុងនោះស្រី២០នាក់ និងកុមារ០៩នាក់ បានវិលត្រឡប់ពីប្រទេសថៃ មកកម្ពុជា តាមភូមិសាស្រ្តប៉ុស្តិ៍ចំបក់ ពួកគេមានទីលំនៅក្នុងខេត្ដចំនួន ០៨ គឺ ១.ខេត្តបន្ទាយមានជ័យ ចំនួន១៤នាក់, ២.ខេត្តបាត់ដំបង ចំនួន០៥នាក់, ៣.ខេត្តសៀមរាប ចំនួន១៧នាក់, ៤.ខេត្តកំពង់ធំ ចំនួន០៤នាក់, ៥.ខេត្តពោធិ៍សាត់ ចំនួន១១នាក់, ៦.ខេត្តតាកែវ ចំនួន០១នាក់, ៧.ខេត្តត្បូងឃ្មុំ ចំនួន០២នាក់, ៨.ខេត្តព្រៃវែង ចំនួន០៩នាក់ ។ បន្ទាប់ពីធ្វើការណែនាំ ស្ដីពី ការឆ្លងរាលដាលនៃ ជំងឺកូវីដ១៩ រួចមក កម្លាំងប៉ុស្ដិ៍ចំបក់ សហការជាមួយគ្រូពេទ្យមន្ទីរពេទ្យបង្អែកម៉ាឡៃសន្ដិភាព កម្លាំងផ្នែកសឹករងស្រុកម៉ាឡៃ និងកម្លាំងប៉ុស្ដិ៍រដ្ឋបាលឃុំបឹងបេង បានប្រគល់ពួកគាត់ ជូនដល់ក្រុមគ្រូពេទ្យ ដើម្បីយកសំណាកធ្វើតេស្តរកមេរោគកូវីដ-១៩ ។
គួរបញ្ជាក់ថា នៅថ្ងៃដដែលនេះដែរ កម្លាំងប៉ុស្តិ៍ស្ពានម៉ាឡៃ ដឹកនាំដោយលោកអនុសេនីយ៍ឯក ឡុក ស៊ីវហ្វុង ជានាយរងប៉ុស្តិ៍ បានសហការជាមួយកម្លាំងយោធា និងក្រុមគ្រូពេទ្យមន្ទីរពេទ្យបង្អែកម៉ាឡៃសន្តិភាព ពិនិត្យ និងយកសំណាកប្រជាពលរដ្ឋថៃដែលបើករថយន្តដឹកទំនិញចូលកម្ពុជា ធ្វើតេស្តរកមេរោគកូវីដ១៩ លទ្ធផលអវិជ្ជមាន និងធ្វើការត្រួតពិនិត្យរថយន្តដឹកទំនិញឆ្លងកាត់ និងណែនាំដល់ប្រជាពលរដ្ឋខ្មែរដែលចេញចូល នៅច្រកទ្វារតំបន់ម៉ាឡៃ ពីវិធីបង្កា ការពារ ការរាលដាលនៃជំងឺកូវីដ១៩ នៅច្រកទ្វារតំបន់ម៉ាឡៃ ខេត្តបន្ទាយមានជ័យផងដែរ ៕
ដោយ ៖ KPN
