សន្តិសុខ និង សង្គម
មន្ដ្រីជំនាញ ចុះចាប់រថយន្ដមួយគ្រឿងលួចនាំជ្រូកពីវៀតណាម មកកាន់កម្ពុជា តាមច្រកប្រាសាទ ក្រុងស្វាយរៀង
ស្វាយរៀង៖ មន្ដ្រីជំនាញ និងផ្នែកពាក់ព័ន្ធ ចុះស្ទាក់ចាប់រថយន្ដដឹកអ្នកដំណើរមួយគ្រឿង ដែលលួចនាំជ្រូកពីប្រទេសវៀតណាម មកកាន់កម្ពុជា តាមច្រកប្រាសាទ ក្រុងស្វាយរៀង ដោយគ្មានច្បាប់អនុញ្ញាត។
ប្រតិបត្តិការនេះ ធ្វើឡើងនៅវេលាម៉ោង ២២ និង១០នាទីយប់ ឆ្លងចូលព្រឹកថ្ងៃទី២៦ ខែឧសភា ឆ្នាំ២០២២ ដោយមានការសម្របសម្រួលនីតិវិធីពីព្រះរាជអាជ្ញា នៃអយ្យការអមសាលាដំបូងខេត្តស្វាយរៀង ឱ្យក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តស្វាយរៀង។
ក្នុងប្រតិបត្តិការនេះ មន្ដ្រីជំនាញ ស្ទាក់ចាប់រថយន្ត០១គ្រឿង ម៉ាកSsangyong istana ពណ៌ទឹកប្រាក់ ជាប្រភេទរថយន្តដឹកឣ្នកដំណើរ ១៥កៅឣី ពាក់ស្លាកលេខភ្នំពេញ២N-៥៦៣៤ ដឹកសត្វជ្រូករស់ចំនួន ២០ក្បាល ដោយនាំចូលពីប្រទេសវៀតណាម មកកាន់ប្រទេសកម្ពុជា តាមច្រកប្រាសាទ សង្កាត់ប្រាសាទ ក្រុងបាវិត ខេត្តស្វាយរៀង បម្រុងនឹងយកទៅចែកចាយនៅក្រុងស្វាយរៀង (តាមការឆ្លើយបញ្ជាក់ពីម្ចាស់) ដោយគ្មានលិខិតអនុញ្ញាតអ្វីទាំងអស់។ ក្រុមការងារបានឃាត់នៅលើផ្លូវជាតិលេខ៣១៤ ភូមិតាណរ សង្កាត់ស្វាយតឿ ក្រុងស្វាយរៀង ខេត្តស្វាយរៀង។
ក្រុមការងារបាននាំយកបទល្មើស និងវត្ថុតាងទាំងនោះទៅរក្សាទុកនៅទីតាំងចត្តាឡីស័កសត្វ របស់មន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង ដើម្បីចាត់ការទៅតាមនីតិវិធីច្បាប់៕
