ព័ត៌មានជាតិ
អាវុធហត្ថខេត្តបន្ទាយមានជ័យ បញ្ជូនជនសង្ស័យម្នាក់ទៅតុលាការ ពាក់ព័ន្ធករណីលួចទ្រព្យសម្បតិ្តអ្នកដទៃ
បន្ទាយមានជ័យ ៖ ជនសង្ស័យម្នាក់ត្រូវបានកម្លាំងអាវុធហត្ថក្រុងប៉ោយប៉ែត ធ្វើការឃាត់ខ្លួនបញ្ជូនទៅតុលាការ កាលពីរសៀលថ្ងៃទី១៣ ខែមិថុនា ឆ្នាំ២០២៣ ពាក់ព័ន្ធករណីលួចទ្រព្យសម្បតិ្តអ្នកដទៃ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារស្រាវជ្រាវ និងបង្ក្រាបបទល្មេីស បានឱ្យដឹងថា ជនសង្ស័យខាងលើមានឈ្មោះ ឯក ចាន់ត្រា ភេទប្រុស អាយុ២៩ឆ្នាំ ជនជាតិខ្មែរ បច្ចុប្បន្នរស់នៅមិនពិតប្រាកដ ក្រុងប៉ោយប៉ែត ខេត្តបន្ទាយមានជ័យ ។ ជនសង្ស័យត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត ធ្វើការបង្ក្រាបឃាត់ខ្លួនកាលពីថ្ងៃទី១២ ខែមិថុនា ឆ្នាំ២០២៣ បន្ទាប់ពីជនសង្ស័យរូបនេះ បានធ្វើសកម្មភាពលួចចូលក្នុងផ្ទះ របស់ជនរងគ្រោះឈ្មោះ សោម ម៉ីម៉ី ភេទស្រី អាយុ២៣ឆ្នាំ នៅភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត យកម៉ាស៊ីនបំលែងភ្លើងអគ្គិសនី(អាំងវ៉ូទ័រ) ចំនួន០១គ្រឿង និងកន្ទេល០១ កាលពីវេលាម៉ោង២៣ និង០០នាទីយប់ថ្ងៃទី១១ ខែមិថុនា ឆ្នាំ២០២៣ ។
លោកបន្តថា ករណីនេះសមត្ថកិច្ច បានធ្វើការដកហូតវត្ថុតាង ម៉ាស៊ីនបំលែងភ្លើងអគ្គិសនី(អាំងវ៉ូទ័រ) ចំនួន០១គ្រឿង ប្រគល់ជូនម្ចាស់ដើមវិញផងដែរ ។
ក្រោយឃាត់ខ្លួននិងសាកសួរ ជនសង្ស័យត្រូវបានកម្លាំងជំនាញ កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ៕
