ព័ត៌មានជាតិ
ប្រកាសផ្លាស់ប្តូរមេបញ្ជាការកងរាជអាវុធហត្ថក្រុងសិរីសោភ័ណ និងស្រុកអូរជ្រៅ
បន្ទាយមានជ័យ ៖ នៅព្រឹកថ្ងៃទី១៥ ខែមករា ឆ្នាំ២០២៤ បញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានប្រកាសផ្លាស់ប្តូរមេបញ្ជាការកងរាជអាវុធហត្ថក្រុងសិរីសោភ័ណ និងមេបញ្ជាការកងរាជអាវុធហត្ថស្រុកអូរជ្រៅ ។
ពិធីនេះប្រព្រឹត្តទៅក្រោមអធិបតីភាពលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ ដោយបានប្រកាសតែងតាំងលោកអនុសេនីយ៍ឯក សុខ ឡេង ពីមេបញ្ជាការរងមូលដ្ឋានក្រុងសិរីសោភ័ណ ទៅជាមេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ ជំនួសលោកវរសេនីយ៍ត្រី យ៉ាន់ សុវណ្ណ ត្រូវបានផ្លាស់ប្តូរទៅជាប្រធានមន្ទីរភស្តុភារ ។ លោកអនុសេនីយ៍ឯក ហ៊ូ សារី ពីមេបញ្ជាការរងមូលដ្ឋានក្រុងប៉ោយប៉ែត ទៅជាមេបញ្ជាការមូលដ្ឋានកងរាជអាវុធហត្ថស្រុកអូរជ្រៅ ជំនួសលោកវរសេនីយ៍ត្រី ជា ពិសី ត្រូវបានផ្លាស់ប្តូរទៅជាប្រធានមន្ទីរសម្ភារបច្ចេកទេស ។ និងបានដំឡេីងឋាន្តរសក្តិជូនមន្ត្រីអាវុធហត្ថចំនួន៤១នាក់, តែងតាំង ផ្លាស់ប្តូរមុខដំណែងមានចំនួន៣៣នាក់ផ្សេងទៀត និងផ្ទេរភារកិច្ចយោធិន នៃកងរាជអាវុធហត្ថចំនួនចំនួន១៨រូបបន្ថែមទៀតផងដែរ ។
មានប្រសាសន៍នាឱកាសនោះលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បានថ្លែងនូវការកោតសរសើរ និងអរគុណចំពោះមេបញ្ជាការរង ប្រធានស្ថាប័ន អង្គភាពមូលដ្ឋាន ក្នុងកងរាជអាវុធហត្ថទាំងអស់ ដែលបានចូលរួមគោរពបទបញ្ជា និងអនុវត្តរាល់ការណែនាំរបស់លោកនាយឧត្តមសេនីយ៍ សៅ សុខា ប្រកបដោយឆន្ទៈ និងមានទំនួលខុសត្រូវខ្ពស់ក្នុងការអនុវត្តតួនាទី ភារកិច្ចស្នូលរបស់ខ្លួន។
លោកមេបញ្ជាការ ក៏បានលេីកឡេីងថា ការអនុវត្តតួនាទី និងភារកិច្ច កងរាជអាវុធហត្ថឆ្នាំ២០២៣កន្លងមក កម្លាំងអាវុធហត្ថយើង បានចូលរួមចំណែកយ៉ាងសកម្ម ក្នុងការការពារសន្តិសុខ រក្សាសណ្ដាប់ធ្នាប់ ស្រាវជ្រាវបង្ក្រាបបទល្មើស និងការអនុវត្តច្បាប់ បទបញ្ជា បានល្អប្រសើរ ។ និងបានផ្តាំផ្ញើដល់ប្រធានស្ថាប័នទាំងអស់ត្រូវបន្តក្នុងការការពារសន្តិសុខ រក្សាសណ្ដាប់ធ្នាប់ ស្រាវជ្រាវបង្ក្រាបបទល្មើស និងជួយសង្គ្រោះប្រជាជនក្នុងគ្រោះថ្នាក់ផ្សេងៗបន្តទៀត ៕