ព័ត៌មានជាតិ
លោក បោន ប៊ិន នាំយកកុំព្យូទ័រ និងសម្ភារៈកីឡា ផ្តល់ជូនដល់ការិយាល័យអប់រំស្រុក និងសាលារៀន នៅក្នុងស្រុកភ្នំស្រុក
បន្ទាយមានជ័យ ៖ លោកកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បាននាំយកកុំព្យូទ័រ ១៣គ្រឿង និងសម្ភារៈកីឡាមួយចំនួន ផ្តល់ជូនដល់ការិយាល័យអប់រំស្រុក និងសាលារៀនទាំង១២ នៅក្នុងស្រុកភ្នំស្រុក ខេត្តបន្ទាយមានជ័យ សម្រាប់ប្រើប្រាស់តាមសាលា ដើម្បីលើកស្ទួយវិស័យអប់រំ ឱ្យកាន់តែមានភាពប្រសើរឡើងបន្ថែមទៀត ។
លោកឧត្តមសេនីយ៍ត្រី បោន ប៊ិន បានឲ្យដឹងថា អំណោយទាំងនេះ គឺ ជាការឧបត្ថម្ភរបស់លោក ឈឿង ឈីវអៀន ប្រធានសភាពាណិជ្ជកម្មខេត្តបន្ទាយមានជ័យ ជូនដល់ការិយាល័យអប់រំស្រុក និងសាលារៀនទាំង១២ នៅក្នុងស្រុកភ្នំស្រុកនេះ ។ ជាមួយគ្នានោះដែរ លោកក៏បានថ្លែងនូវការកោតសរសេីរចំពោះលោកគ្រូ-អ្នកគ្រូ ដែលបានចូលរួមចំណែកយ៉ាងសំខាន់មិនអាចខ្វះបាន ក្នុងការបណ្តុះបណ្តាលធនធានមនុស្ស ប្រកបដោយចំណេះដឹង ដល់សិស្សានុសិស្ស ។
លោកឧត្តមសេនីយ៍ត្រី បន្តថា វិស័យអប់រំត្រូវបានប្រមុខរាជរដ្ឋាភិបាលកម្ពុជា ចាត់ទុកជាវិស័យអាទិភាពឈានមុខគេ ក្នុងការបណ្តុះបណ្តាលនូវធនធានមនុស្ស ដូច្នេះ អាណាព្យាបាលដែលមានកូនៗ គ្រប់អាយុ សូមនាំកូនៗ ទៅចុះឈ្មោះចូលរៀនឱ្យបានគ្រប់ៗគ្នា ។
គួរបញ្ជាក់ថា កុំព្យូទ័រទាំង១៣គ្រឿង ត្រូវបានផ្តល់ជូនការិយាល័យ អប់រំស្រុកចំនួន១គ្រឿង និងសាលារៀនចំនួន១២សាលា ទទួលបានមួយសាលាមួយ១គ្រឿង ព្រមទាំងសម្ភារៈកីឡាមានដូចជា ៖ អាវ១៤១ឈុត បាល់ទះ១០គ្រាប់ បាល់ទាត់១៥គ្រាប់ សារុង១៤១សារុង ភេសជ្ជ:ចំនួន៥០កេស និងលោកគ្រូ-អ្នកគ្រូ ដែលបានចូលរួម ចំនួន១៤១នាក់ ក្នុងម្នាក់ទទួលបានថវិកា៥ម៉ឺនរៀលផងដែរ ៕
