ព័ត៌មានជាតិ
លោក ហ៊ឹល រ៉ាយ៉ា ៖ បញ្ហាវិវាទដីធ្លី នៅខេត្តបន្ទាយមានជ័យ មានការថយចុះដោយសារ ការចុះបញ្ជីដីធ្លីមានលក្ខណៈជាប្រព័ន្ធ
បន្ទាយមានជ័យ ៖ លោក ហ៊ឹល រ៉ាយ៉ា អភិបាលរង តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ លើកឡើងថា បច្ចុប្បន្ននៅក្នុងខេត្តបន្ទាយមានជ័យ បញ្ហាវិវាទដីធ្លី មានការថយចុះជាច្រើន ដោយសារតែ មានការចុះបញ្ជីដីធ្លីមានលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លី ។
ការលើកឡើងដូច្នេះ ធ្វើឡើងកាលពីថ្ងៃទី៩ ខែមីនា ឆ្នាំ២០២៣ ក្នុងពិធីប្រកាសកំណត់តំបន់វិនិច្ឆ័យ លើការចុះបញ្ជីដីធ្លី មានលក្ខណៈជាប្រព័ន្ធ ដល់ភូមិតារាងបាល់ ភូមិភ្នំកន្ទួត និងភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ នៅទីស្នាក់ការសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
លោកបន្តថា ជាការពិតណាស់ ដែលការចុះបញ្ជីដីធ្លីពិតជាមានសារៈសំខាន់ ព្រោះអាចកាត់បន្ថយនូវបញ្ហាទំនាស់ ធានាបាននូវសុវត្ថិភាពដី ពីការក្លែងបន្លំពីសំណាក់ជនខិលខូចមួយចំនួន កាត់បន្ថយភាពក្រីក្រ ស្ថេរភាពសង្គម និងការអភិវឌ្ឍន៍សេដ្ឋកិច្ច ឱ្យកាន់តែប្រសើរឡើង ស្របតាមគោល នយោបាយ របស់រាជរដ្ឋាភិបាល ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី អណត្តិទី៦នេះ ។
ជាមួយគ្នានេះលោក រ៉ូ បូរ៉ា អនុប្រធានមន្ទីររៀបចំដែនដី នគរូបនីយកម្ម និងសំណង់ខេត្តបន្ទាយមានជ័យ បានបញ្ជាក់ជូនបងប្អូនប្រជាពលរដ្ឋឱ្យដឹងថា នីតិវិធីនៃការចុះបញ្ជីដីធ្លី មានលក្ខណៈជាប្រព័ន្ធមាន៥ដំណាក់កាល ៖ ១-ត្រៀមរៀបចំ គឺជា ការកំណត់តំបន់វិនិច្ឆ័យ ការបង្កេីតគណៈកម្មការដ្ឋបាល ការជូនដំណឹង កិច្ចប្រជុំផ្សព្វផ្សាយ និងដំណេីរការផ្សព្វផ្សាយ ពីការចុះបញ្ជីដីធ្លីមានលក្ខណៈជាប្រព័ន្ធ ។ ២-ប្រតិបត្តិការបច្ចេកទេស គឺជា ការចុះកំណត់ព្រំវាស់វែង និងវិនិច្ឆ័យ ដេីម្បីកាសងប្លង់សុរិយោដី និងបញ្ជីឈ្មោះម្ចាស់ដី ។ ៣-បិទផ្សាយជាសាធារណៈនូវឯកសារនៃការវិនិច្ឆ័យ (ប្លង់សុរិយោដី និងបញ្ជីឈ្មោះម្ចាសដី) រយៈពេល១៥ថ្ងៃ ដេីម្បីទុកលទ្ធភាពឱ្យម្ចាស់ដី និងអ្នកដែលពាក់ព័ន្ធធ្វេីការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វេីការតវ៉ាក្នុងករណីមានការខុសឆ្គង ។ ផុតរយៈពេលកំណត់នៃការបិទផ្សាយ បងប្អូនប្រជាពលរដ្ឋ មិនអាចជំទាស់តវ៉ាបានទៀតឡេីយ ។ ៤-សម្រេចលេីឯកសារវិនិច្ឆ័យ របាយការណ៍ពីលទ្ធភាព នៃកាតបិទផ្សាយជាសាធារណៈ នូវឯកសារនៃការវិនិច្ឆ័យរបស់គណៈកម្មការរដ្ឋបាល ជូនអភិបាលខេត្ត ដេីម្បីពិនិត្យ និងសម្រេចលេីការផ្យល់សិទ្ធ ចំពោះក្បាលដីណាដែលមិនមានទំនាស់ ។ ៥-ចុះបញ្ជីចេញប័ណ្ណ និងចែកប័ណ្ណជូនម្ចាស់ដី ៕
