ព័ត៌មានជាតិ
សមត្ថកិច្ច ឃាត់ខ្លួនជនសង្ស័យ០៧នាក់ ក្រោយប្រេីប្រាស់ កាំបិតខ្វែវកាប់ប្លន់យកម៉ូតូ
បាត់ដំបង ៖ ជនសង្ស័យប្រុសស្រី ៧នាក់ ត្រូវបានកម្លាំងនគរបាលខេត្តបាត់ដំបង សហការជាមួយកម្លាំងនគរបាលក្រុងប៉ោយប៉ែត ខេត្តបន្ទាយមានជ័យ ធ្វើការឃាត់ខ្លួន ក្រោយប្រេីប្រាស់កាំបិតខ្វែវកាប់ប្លន់ម៉ូតូ ។
លោកវរសេនីយ៍ឯក ឈឿង គឹមសុង ស្នងការរងនគរបាលខេត្តបាត់ដំបង បានអោយដឹងថា កិច្ចប្រតិបត្តិការខាងលើនេះធ្វើឡើងកាលពីថ្ងៃទី ២៤ ខែមីនា ឆ្នាំ ២០២៣ នៅចំណុចភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដោយបានឃាត់ខ្លួនជនសង្ស័យម្នាក់ឈ្មោះ សល់ ស៊ឺ ភេទប្រុស អាយុ១៤ឆ្នាំ មានទីលំនៅភូមិប៉ាលិលេយ្យ១ ក្រុងប៉ោយប៉ែត ខេត្តបន្ទាយមានជ័យ ហើយក្រោយពីឃាត់ខ្លួនសាកសួររួច រហូតដល់វេលាម៉ោង ២០និង៥៣នាទី ថ្ងៃដដែល នៅចំណុចភូមិភ្នំសំពៅ ឃុំភ្នំសំពៅ ស្រុកបាណន់ ខេត្តបាត់ដំបង សមត្ថកិច្ចបានធ្វេីការនាំខ្លួន ជនសង្ស័យចំនួន ០៦នាក់បន្ថែមទៀត ។
ដែលជនសង្ស័យត្រូវបានឃាត់ខ្លួន ទី១-ឈ្មោះ អេង វិជ្ជា ហៅ ជា ភេទប្រុស អាយុ១៧ឆ្នាំ(ជាអ្នកធ្វេីសកម្មភាព), ២-ឈ្មោះ ជា ចន្នី ភេទស្រី អាយុ១៧ឆ្នាំ, ៣-ឈ្មោះ សាត ង៉ា ភេទប្រុស អាយុ ១៩ឆ្នាំ, ៤-ឈ្មោះ តឿម វិបុល ហៅ គូ ភេទប្រុស អាយុ១៧ឆ្នាំ, ៥-ឈ្មោះ វ៉ាន់ ដឿន ភេទប្រុស អាយុ ១៥ឆ្នាំ, ៦-ឈ្មោះ រុន ស៊ីដេត ភេទប្រុស អាយុ១៧ឆ្នាំ ។
វត្ថុតាងដកហូតរួមមាន ៖ ម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ ២០១៦ គ្មានស្លាកលេខ ( ជាម៉ូតូជិះធ្វេីសកម្មភាព ), ម៉ូតូ ម៉ាកហុងដាឌ្រីម សេ១២៥ ពណ៌ ខ្មៅ ស៊េរីឆ្នាំ ២០១៨ គ្មានស្លាកលេខ ( ជាម៉តូរបស់ជនរងគ្រោះ ), ម៉ូតូ ម៉ាកហុងដា ឌ្រីម សេ១២៥ ពណ៌ ខ្មៅ ស៊េរី ឆ្នាំ២០២២ គ្មានស្លាកលេខ ( ជារបស់ជនរងគ្រោះ ) ។
ក្រោយពីឃាត់ខ្លួនជនសង្ស័យខាងលើ ត្រូវបានការិយាល័យជំនាញ កសាងសំណុំរឿងបញ្ជូនទៅសាលាដំបូងខេត្តបាត់ដំបង ចាត់ការតាមនីតិវិធី ៕
ដោយ ៖ សាលី
