ព័ត៌មានជាតិ
ដីព្រៃប្រមាណ ៤០ ហិកតានៅស្រុកភ្នំក្រវាញរងការកាប់ទន្ទ្រាន ខណៈអាជ្ញាធរ និងមន្ដ្រីជំនាញបានត្រឹមតែចុះពិនិត្យមើល
ពោធិ៍សាត់៖ អាជ្ញាធរ និងជំនាញបានត្រឹមតែកំពុងស្រាវជ្រាវ និងសូមរូបពីអ្នកព័ត៌មាន ដើម្បីឱ្យមន្រ្តីចុះមើល ខណៈដីព្រៃក្បែរស្នាក់ការឧទ្សានជាតិជួរភ្នំក្រវាញកណ្តាល ប្រមាណជាង ៤០ ហិកតា ត្រូវបានកាប់រុកទន្ទ្រានដោយគ្មានខ្លាចញញើតច្បាប់បន្តិចណាសោះ។
តាមប្រភពព័ត៌មានពីប្រជាពលរដ្ឋ បានឲ្យដឹងថា មានបុគ្គលពីរនាក់មានលុយមានអំណាចបានកាប់រុកទន្ទ្រានដីព្រៃឧទ្យានទេសចរណ៍អូដា នៅចំណុចល្អាងម្នាស់ជាប់នឹងអូដា ភូមិវាលវង់ ឃុំរកាត ស្រុកភ្នំក្រវាញខេត្តពោធិ៍សាត់ តាំងពីខែ១១ឆ្នាំ២០២២ មកម៉្លេះ តាមរយៈជួលអោយគេចូលកាប់ពេលយប់ ហើយមកទល់ពេលនេះមិនដែលឃើញមន្ត្រីបរិស្ថានដែលមានស្នាក់ការនៅជិតនោះចុះទៅទប់ស្កាត់ឡើយ។
បើតាមលោក សន ប៊ុនឈាង មេភូមិវាលវង់ នឹងលោកមេឃុំរកាត បានបង្ហើបថា ទីតាំងចំណុចខាងលើហ្នឹង ក្រោមការគ្រប់គ្រងរបស់បរិស្ថាន ហើយការកាប់ទន្ទ្រាននៅទីតាំងនោះ លោកក៏បានដឹងដែរ ហើយក៏ធ្លាប់បានរាយការណ៍ទៅអភិបាលស្រុកពេលប្រជុំគណៈប្រជាការឯកភាពម្ដងៗ លោកតែងតែលើកសកម្មភាពទាំងនោះមកដែរ។
ដើម្បីកាន់តែច្បាប់ភ្នាក់ងារព័ត៌មានយើងបានធ្វើការទំនាក់ទំនងតាមទូរសព្ទទៅលោក ហេង សុភាណា អភិបាលស្រុកភ្នំក្រវាញលោកថាពាក់ព័ន្ធករណីខាងលើនេះ លោកក៏បានដឹងហើយលោកកំពុងតែវែករកបុគ្គលដែលរុកទន្ទ្រានដីព្រៃទាំងនោះមកចាត់ប្រធានការតាមផ្លូវច្បាប់ ។
ជុំវិញករណីខាងលើនេះ ខាងអង្គភាពសារព័ត៌មានយើងព្យាយាមទំនាក់ទំនងទៅលោក វុធ ប្រធានស្នាក់ការឧទ្យានជាតិជួរភ្នំប្រវាញកណ្ដាល ដែលប្រចាំការនៅទីនោះទាក់ទងមិនបានឡើយ។
លោក គង់ ពុទ្ធារ៉ា ប្រធានមន្ទីរបរិស្ថានខេត្តពោធិ៍សាត់ បានប្រាប់មកអង្គភាពសារព័ត៌មានយើងថា សូមជួយបាញ់រូបភាពនៅទីតាំងនោះឲ្យលោក នឹងចាត់មន្ត្រីក្រោមឱវាទចុះត្រួតពិនិត្យមើល។
ចំណែកលោកឯកឧត្តម សាយ សុជាតិ អភិបាលនៃគណៈអភិបាលរងខេត្តទទួលផ្នែកបរិស្ថានលោកថា ជុំវិញករណីខាងលើនេះ លោកមិនបានដឹងឡើយចាំលោកទំនាក់ទំនងទៅខាងមន្ត្រីរបស់លោកសិន៕
