ព័ត៌មានជាតិ
ច្រៀងចប់មេជាងដែកដើរចេញក្រៅ ឱ្យកូនជាងចេញថ្លៃបន្ទប់ KTV ខឹងយកដុំឥដ្ឋគប់កញ្ចក់ឡានមេបន្ធូរកំហឹង
បន្ទាយមានជ័យ៖ ជនសង្ស័យជាកូនជាងដែកម្នាក់ យកដុំឥដ្ឋគប់កញ្ចក់ឡានមេជាង ព្រោះខឹងមេជាងឱ្យចេញថ្លៃបន្ទប់ខារ៉ាអូខេ ទាំងខ្លួនមិនមានលុយ ត្រូវបានកម្លាំងកងអន្តរាគមន៍កងរាជអាវុធហត្ថខេត្តបន្ទាយមានជ័យ ឃាត់ខ្លួនបញ្ជូនទៅតុលាការ កាលពីព្រឹកថ្ងៃទី១មិថុនា២០២៣។
លោកវរសេនីយ៍ត្រី ចាំង សុភ័ក្រ នាយការិយាល័យផែនការប្រតិបត្តិការ ចុះឃាត់ជនសង្ស័យម្នាក់ពាក់ព័ន្ធករណីធ្វើឱ្យខូចខាតដោយចេតនា ដែលប្រព្រឹត្តកាលពីវេលាម៉ោង០៣និង ៤០នាទី ថ្ងៃទី៣១ ខែឧសភា ឆ្នាំ២០២៣ នៅចំណុចខារ៉ាអូខេឌីហ្គោល ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្ត បានឱ្យដឹងថា ជនសង្ស័យឈ្មោះ កែវ ផានិត (ហៅខ្លឹង) ភេទប្រុស អាយុ៣៧ឆ្នាំ មុខរបរជាងផ្សាដែក បច្ចុប្បន្នស្នាក់នៅស្រុកអូរជ្រៅ ខេត្តបន្ទាយមានជ័យ។
ក្រោយឃាត់ខ្លួន និងសួរនាំជនសង្ស័យ បានសារភាពថា ខ្លួនពិតជាបានធ្វើសកម្មភាពយកដុំឥដ្ឋប្រហោង គប់ទៅលើកញ្ចក់រថយន្តម៉ាក តូយ៉ូតាព្រុស ពណ៌ទឹកសមុទ្រ របស់មេជាងផ្សាដែករបស់ខ្លួនពិតប្រាកដមែន ដោយសាររឿងមេជាងរបស់ខ្លួនឱ្យជួយចេញថ្លៃបន្ទប់ KTV ទាំងខ្លួនមិនមានលុយ ហើយមេជាងបានដើរចេញទៅក្រៅ ពេលនោះខ្លួនក៏មានចិត្តខឹង ក៏បានយកដុំឥដ្ឋគប់កញ្ចក់រថយន្តមេជាងនោះតែម្តង ហើយរូបខ្លួនក៏បានប្រើប្រាស់គ្រឿងញៀនជាប្រចាំផងដែរ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើស បានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ៕
