ព័ត៌មានជាតិ
ទណ្ឌិតក្នុងពន្ធនាគារខេត្តបន្ទាយមានជ័យ ១៩នាក់ ត្រូវបានប្រកាសបន្ធូរបន្ថយទោស ពី៣ទៅ៦ខែ
បន្ទាយមានជ័យ ៖ ទណ្ឌិតជាប់ឃុំ នៅក្នុងពន្ធនាគារខេត្តបន្ទាយមានជ័យ ចំនួន១៩នាក់ ត្រូវបានប្រកាសបន្ធូរបន្ថយទោស ពី៣ទៅ៦ខែ ក្នុងឱកាសពិធីបុណ្យចូលឆ្នាំ ប្រពៃណីជាតិ និងបុណ្យវិសាខបូជា ឆ្នាំ២០២៣ ។
ពិធីប្រកាសនេះប្រព្រឹត្តទៅនៅក្នុងពន្ធនាគារខេត្តបន្ទាយមានជ័យស្ថិតនៅភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ នាថ្ងៃទី១៥ ខែមិថុនា ឆ្នាំ២០២៣ ក្រោមការចូលរួមពីលោក ង៉ោ ម៉េងជ្រួន អភិបាលខេត្តបន្ទាយមានជ័យស្តីទី លោក ស៊ិន វិសុទ្ធ ព្រះរាជអាជ្ញារង តំណាងឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ លោកឧត្តមអត្គានុរក្សថ្នាក់លេខ២ អ៊ុង សុីផាន ប្រធានពន្ធនាគារខេត្តបន្ទាយមានជ័យ ។
លោកឧត្តមអត្គានុរក្សថ្នាក់លេខ២ អ៊ុង សុីផាន បានឱ្យដឹងថា ពន្ធនាគារខេត្តបន្ទាយមានជ័យ បានអនុវត្តនូវតួនាទីភារកិច្ច ការអប់រំកែប្រែស្ដានិតិសម្បទា ការបណ្ដុះបណ្ដាលវិជ្ជាជីវៈ ការរក្សាសន្តិសុខសណ្ដាប់ធ្នាប់នៅក្នុងពន្ធនាគារ ការងារកសិកម្ម សិប្បកម្ម ការអភិវឌ្ឍធនធានមនុស្ស និងការអភិវឌ្ឍហេដ្ឋារចនាសម្ព័ន្ធនានាប្រកបដោយភាពទទួលខុសត្រូវខ្ពស់ ។ ក្រៅពីនេះអង្គភាពក៏មានប៉ុស្តិ៍សុខភាពមួយខ្នងដែលគ្រប់គ្រងដោយអង្គភាពផ្ទាល់ និងមានផ្នែកសុខាភិបាលជាអ្នកទទួលខុសត្រូវ ។
ជាមួយគ្នានោះ លោក ង៉ោ ម៉េងជ្រួន អភិបាលខេត្តបន្ទាយមានជ័យស្តីទី ក៏បានមានប្រសាសន៍ណែនាំ ដល់ទណ្ឌិតដែលត្រូវបានបន្ធូបន្ថយ ឬលេីកលែងទោស ពេលបានត្រលប់ទៅភូមិឋាន ស្រុកកំណេីតវិញ ត្រូវកែប្រែខ្លួន ឱ្យក្លាយជាពលរដ្ឋល្អនៅក្នុងសង្គម ជាពិសេសចំណេះជំនាញដែលទទួលបានពីការបង្ហាត់បង្រៀន សូមយកទៅបេីករបរដេីម្បីចិញ្ចឹមគ្រួសារជាដេីម ។
សូមបញ្ជាក់ថា ការបន្ធូបន្ថយទោសដល់ទណ្ឌិតខាងលើ សរុបមានចំនួន១៩នាក់ ស្រី០ ក្នុងនោះបន្ធូរបន្ថយទោស ០៣ខែ ចំនួន១៧នាក់, បន្ធូរបន្ថយទោស ០៦ខែ ចំនួន០២នាក់ ។ ដោយឡែក ទណ្ឌិតដែលកំពុងជាប់ឃុំនៅក្នុងពន្ធខេត្តបន្ទាយមានជ័យ បច្ចុប្បន្ន សរុបមានចំនួន ១៦០២/ស្រី៨៣នាក់ ៕
