ព័ត៌មានជាតិ
ឯកឧត្តម បោន ប៊ិន អញ្ជេីញសំណេះសំណាល និងបំពាក់គ្រឿងឥស្សរិយយសជូនអតីតយុទ្ធជនកម្ពុជា ស្រុកភ្នំស្រុក
បន្ទាយមានជ័យ ៖ នៅព្រឹកថ្ងៃទី២៤ ខែមិថុនា ២០២៣ ឯកឧត្តម បោន ប៊ិន សមាជិកអចិន្ត្រៃយ៍គណបក្សខេត្ត ប្រធានក្រុមការងារគណបក្សចុះមូលដា្ឋនស្រុកភ្នំស្រុក បានអញ្ជេីញជាអធិបតីភាព ក្នុងពិធីសំណេះសំណាល និងបំពាក់គ្រឿងឥស្សរិយយសជូនអតីតយុទ្ធជនកម្ពុជា ស្រុកភ្នំស្រុក និងប្រកាសបញ្ចូលសកម្មជនមកពីគណបក្សផ្សេងៗ ចូលរួមជីវភាពជាមួយគណបក្សប្រជាជនកម្ពុជាស្រុកភ្នំស្រុក ។
ពិធីនេះក៏មានការអញ្ជេីញចូលរួមពីសំណាក់ ឯកឧត្តម ឃ្លោក នួយ ឯកឧត្តម ជឹម ប៊ុនអាន អនុប្រធានក្រុមការងារគណបក្សចុះមូលដា្ឋនស្រុកភ្នំស្រុក ប្រធាន-អនុប្រធានក្រុមការងារគណបក្សចុះមូលដា្ឋនឃុំទាំង០៦ ក្រុមការងារគណបក្សចុះមូលដា្ឋនភូមិទាំង៥៩ យុវជនស្រុក-ឃុំ និងភូមិសរុបជិត១៤០០នាក់ ដែលប្រារព្ធធ្វេីឡេីងនៅភោជនីយ៍ដ្ឋាន លី គ្រុះ ស្ថិតក្នុងភូមិមាត់ស្រះ ឃុំស្រះជីក ស្រុកភ្នំស្រុក ខេត្តបន្ទាយមានជ័យ ។
ឯកឧត្ដម បោន ប៊ិន បានពាំនាំនូវប្រសាសន៍ផ្តាំផ្ញេីសាកសួរសុខទុក្ខពីសំណាក់ ឯកឧត្ដម ឧបនាយករដ្ឋមន្ត្រី កែ គឹមយ៉ាន ប្រធានក្រុមការងាររាជរដ្ឋាភិបាលចុះជួយខេត្តបន្ទាយមានជ័យ ឯកឧត្ដម អ៊ុំ រាត្រី ប្រធានគណៈកម្មការគណបក្សប្រជាជនកម្ពុជាខេត្តបន្ទាយមានជ័យ ជូនពោះសមាជិក-សមាជិការ ដោយក្តីនឹករលឹកផងដែរ ។
ឯកឧត្តម លេីកឡេីងថា រាជរដ្ឋាភិបាលដឹកនាំដោយគណបក្សប្រជាជនកម្ពុជា ការពារបាននូវ ឯករាជ្យ អធិបតេយ្យ និងបូរណភាពទឹកដីបានយ៉ាងម៉ឹងម៉ាត់ ថែរក្សាសន្តិភាព, ស្ថិរភាពនយោបាយ, សន្តិសុខ សណ្តាប់ធ្នាប់ និងសុវត្ថិភាពសង្គមបានយ៉ាងរឹងមាំ ដោយធ្វើឱ្យបរាជ័យនូវឧបាយកលទុច្ចរិតរបស់ក្រុមប្រឆាំងជ្រុលនិយម និងមជ្ឈដ្ឋានអគតិនានា ដែលបានប្រើប្រាស់ចលនាបដិវត្តន៍ពណ៌ និងប៉ុនប៉ងផ្តួលរំលំរាជរដ្ឋាភិបាលស្របច្បាប់ ជាពិសេសទប់ស្កាត់ការជ្រៀតជ្រែកពីបរទេសចូលកិច្ចការផ្ទៃក្នុងរបស់កម្ពុជា ។
ក្នុងអំឡុងវិបត្តិសេដ្ឋកិច្ចនៃជំងឺកូវីដ-១៩ រាជរដ្ឋាភិបាលបានបង្កើនការយកចិត្តទុកដាក់ លើការរក្សាលំនឹងជីវភាពរបស់ប្រជាជន ជាពិសេសប្រជាជនក្រីក្រ ដែលងាយរងគ្រោះផ្សេងៗ និងបានដោះស្រាយជីវភាពប្រជាជនដែលជួបការលំបាកខ្លាំងនៅក្នុងអំឡុង និងក្រោយវិបត្តិជំងឺកូវីដ-១៩ សម្តេចតេជោ ហ៊ុន សែន បានដាក់ចេញវិធានការជំនួយសង្គមជាច្រើន ជាអាទិ៍កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ, កម្មវិធីសាច់ប្រាក់ពលកម្ម, ការផ្តល់ប្រាក់ឧបត្ថម្ភ សម្រាប់កម្មករនិយោជិតជាដេីម ដែលបានធ្វេីឱ្យជីវភាពរបស់ប្រជាពលរដ្ឋកាន់តែមានភាពល្អប្រសេីរឡេីង ។
ឯកឧត្ដម ក៏បានអំពាវនាវបន្ថែមដល់សមាជិក-សមាជិកា នៃគណបក្សប្រជាជនកម្ពុជា ត្រូវទៅចូលរួមបោះឆ្នោតជូនគណបក្សប្រជាជនកម្ពុជានៅថ្ងៃទី២៣ ខែកក្កដា ឆ្នាំ២០២៣ ដើម្បីបន្តដឹកនាំប្រទេសឱ្យកាន់តែមានការអភិវឌ្ឍរីកចម្រើនទៅមុខបន្ថែមទៀត ។
ព្រមជាមួយគ្នានោះ ឯកឧត្តម បោន ប៊ិន ឯកឧត្តម ជឹម ប៊ុនអាន រួមនឹងក្រុមការងារ ក៏បានបំពាក់គ្រឿងឥស្សរិយយសជូនអតីតយុទ្ធជនកម្ពុជា ស្រុកភ្នំស្រុកចំនួន៥៦៣នាក់ ក្នុងនោះមេដាយមាសចំនួន៤០គ្រឿង និងមេដាយប្រាក់ចំនួន៥២៣គ្រឿង ព្រមទាំងទទួលបានថវិកាឧបត្ថម្ភ ពីឯកឧត្តម បោន ប៊ិន ម្នាក់ៗទទួលបាន៥ម៉ឺនរៀល និងសារុងមួយផងដែរ ។ ដោយឡែកចំពោះ យោធិនពិការចំនួន៣៧នាក់ បានទទួលការឧបត្ថម្ភបន្ថែម ក្នុងម្នាក់ៗ៥ម៉ឺនរៀលទៀតផងដែរ ៕
