ព័ត៌មានជាតិ
សមាជិក-សមាជិកា គណបក្សប្រជាជនកម្ពុជាខេត្តបន្ទាយមានជ័យ ជិត២ម៉ឺននាក់ ចូលរួមដង្ហែរបេីកយុទ្ធនាការឃោសនារកសម្លេងឆ្នោត
បន្ទាយមានជ័យ ៖ ថ្ងៃដំបូងទី១ ខែកក្កដា ឆ្នាំ២០២៣ នៃការបើកយុទ្ធនាការ ឃោសនារកសម្លេងឆ្នោត ជ្រេីសតាំងតំណាងរាស្រ្ត នីតិកាលទី៧ ឆ្នាំ២០២៣ សមាជិក-សមាជិកា គណបក្សប្រជាជនកម្ពុជាប្រមាណជិត២ម៉ឺននាក់ នៅក្នុងខេត្តបន្ទាយមានជ័យ ដឹកនាំដោយលោក ឧបកនាយករដ្ឋមន្ត្រី កែ គឹមយ៉ាន ប្រធានក្រុមការងាររដ្ឋាភិបាលចុះមូលដ្ឋានខេត្តបន្ទាយមានជ័យបានដង្ហែក្បួនឃោសនារកសម្លេងឆ្នោតយ៉ាងគគ្រឹកគគ្រេង ។
លោកឧបកនាយករដ្ឋមន្ត្រី កែ គឹមយ៉ាន បានថ្លែងទៅកាន់សមាជិកក៏ដូចជាពលរដ្ឋថា ជាប្រវត្តិសាស្ត្ររបស់កម្ពុជាក្រោយនៅថ្ងៃទី៧ ខែមករា ឆ្នាំ១៩៧៩ ប្រជាជាតិបានរស់រាន មានជីវិតឡើងវិញ បញ្ចប់សករាជដ៏ខ្មៅងងឹតបំផុត ហើយបើកឡើងនូវសករាជថ្មីរបស់កម្ពុជា គឺ ឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម គណបក្សប្រជាជនកម្ពុជា បានការពារការរស់ឡើងវិញរបស់ប្រជាជន ដោយទប់ស្កាត់មិនឱ្យរបបដ៏ឃោរឃៅនេះអាចវិលត្រឡប់មកវិញបានឡេីយ ។
ជាពិសេស ក្រោយបញ្ចប់សង្គ្រាមដ៏រ៉ាំរ៉ៃ គណបក្សប្រជាជនកម្ពុជា ក្រោយមការដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បង្កើតបានសន្តិភាព និងឯកភាពជាតិពេញលេញ និងឯកភាពទឹកដីទាំងស្រុងចាប់ពីចុងឆ្នាំ១៩៩៨មក តាមរយៈការអនុវត្ត នយោបាយឈ្នះ ឈ្នះ ប្រកបដោយជោគជ័យ ដែលបានធ្វើឱ្យអង្គការចាត់តាំង របស់ពួកឧទ្ទាមកម្ពុជាប្រជាធិបតេយ្យទាំងខាងនយោបាយ និងយោធាត្រូវ រលំរលាយទាំងស្រុង។
លោក ឧបនាយករដ្ឋមន្ត្រី កែ គឹមយ៉ាន បានអំពាវនាវដល់សមាជិក-សមាជិកា ប្រជានជនកម្ពុជា បន្តបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨ នៅក្នុងសន្លឹកឆ្នោត ពិសេសគាំទ្របេក្ខភាពលោក បណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេននាពេលអនាគតនិងដើម្បីឱ្យប្រទេសជាតិកាន់តែមានការអភិវឌ្ឍរីកចម្រើនថែមទៀត ៕