ព័ត៌មានជាតិ
ដំណើរការសាងសង់វិមានឯករាជ្យនៅក្នុងខេត្ដបាត់ដំបងសម្រេចបានជាង ៩០%ហើយ
បាត់ដំបង៖ គម្រោងសាងសង់សួនច្បារចន្លោះវិមានឯករាជ្យ និងការដាំដើមឈើនៅក្នុងបរិវេណសួនសម្តេចក្រឡាហោមវិមានឯករាជ្យ ដើម្បីកែលម្អក្រុងបាត់ដំបងឱ្យមានសោភណភាពកាន់តែស្រស់ស្អាតសម្រេចបានជាង ៩០ ភាគរយហើយ ដែលគ្រោងនឹងរួចរាល់នៅដើមខែសីហាខាងមុខ។
រដ្ឋបាលខេត្តបាត់ដំបងបានរៀបចំសាងសង់សួនច្បារចន្លោះវិមានឯករាជ្យ-ផ្សាររាត្រី ច្រាំងស្ទឹង ផ្លូវដើរ និងការដាំដើមឈើនៅបរិវេណសួនសម្តេចក្រឡាហោមវិមានឯករាជ្យ ដើម្បីកែលម្អក្រុងបាត់ដំបងឱ្យមានសោភណភាពកាន់តែស្រស់ស្អាត។
លោក សឿម ប៊ុនរិទ្ធិ អភិបាលរងខេត្តបាត់ដំបងបានឱ្យដឹងនៅថ្ងៃទី១៦ ខែកក្កដាថា ពាក់ព័ន្ធនឹងការរៀបចំសួនចន្លោះវិមានឯករាជ្យ និងការរៀបចំដាំដើមឈើនៅបរិវេណសួនសម្តេចក្រឡាហោមវិមានឯករាជ្យនេះគឺក្នុងគោលបំណងកែប្រែស្ថានភាពនៅតំបន់ទាំងនោះឱ្យកាន់តែស្រស់ស្អាត និងទាក់ទាញឡើងវិញ។
លោកបានប្រាប់ថា ដោយសារកាលពីមុននៅតំបន់ទាំងនោះវាជាកន្លែងដែលអាជីវករប្រមូលផ្ដុំគ្នាក្នុងការប្រកបមុខរបរលក់ម្ហូបអាហារ។ ដូច្នេះអាជ្ញាធរខេត្តបានផ្លាស់ប្ដូរកន្លែងលក់ម្ហូបអាហារឱ្យទៅជាទីតាំងថ្មីដោយការរៀបចំទីតាំងទាំងនោះឱ្យស្អាត និងមានសណ្ដាប់ធ្នាប់ល្អ ដើម្បីទាក់ទាញភ្ញៀវទេសចរជាតិ និងអន្តរជាតិ ហើយក៏អាចជាទីកន្លែងកម្សាន្តសប្បាយសម្រាប់ឱ្យប្រជាពលរដ្ឋខ្មែរទាំងក្នុងខេត្តទាំងមូលមកដើរកម្សាន្ត និងថតរូបផងដែរ។
មួយវិញទៀត លោកថា ការរៀបចំសួននិងការដាំដើមឈើនេះក៏មានគោលបំណងដើម្បីសម្ដែងទៅដល់ការរំឭកគុណូបការៈដ៏ខ្ពង់ខ្ពស់ទៅដល់ព្រះបាទនរោត្តម សីហនុ ដែលទ្រង់បានធ្វើឱ្យប្រទេសកម្ពុជាទទួលបានឯករាជ្យជាតិពីបារាំង ហើយក៏បានសាងសង់វិមានឯករាជ្យមួយនៅខេត្តបាត់ដំបងដើម្បីជាកន្លែងដែលប្រជាពលរដ្ឋទាំងអស់ក្នុងខេត្តបាត់ដំបងអាចប្រារព្ធពិធីបុណ្យ ៩វិច្ឆិកា។
លោកសឿម ប៊ុនរិទ្ធិ បានបញ្ជាក់ថា៖ ចំពោះការរៀបចំសួនច្បារនៅចន្លោះវិមានឯករាជ្យ ផ្សាររាត្រី ច្រាំងស្ទឹង ផ្លូវដើរនិងការដាំដើមឈើនៅបរិវេណសួនសម្តេចក្រឡាហោមវិមានឯករាជ្យគឺយើងបានសម្រេចជាង៩០ភាគរយហើយ ដែលយើងអាចនឹងបញ្ចប់នៅដើមខែសីហាខាងមុខ។
លោកបន្តថា ចំណែកឯវិមានឯករាជ្យខេត្តបាត់ដំបងវិញគឺបានសាងសង់រួចរាល់ហើយ ប៉ុន្តែបច្ចុប្បន្ននៅតែការងារសម្អាតនិងលាបថ្នាំពណ៌បន្ដិចបន្ដួចដូចទៅនឹងវិមានឯករាជ្យនៅរាជធានីភ្នំពេញប៉ុណ្ណោះ ហើយវិមានឯករាជ្យនេះ អាចនឹងគ្រោងសម្ពោធនៅក្នុងខែសីហាខាងមុខ ក្រោមអធិបតីភាពលោក ស ខេង រដ្ឋមន្ត្រីក្រសួងមហាផ្ទៃ។