ព័ត៌មានជាតិ
សមត្ថកិច្ច ឃាត់ខ្លួនបុរស២នាក់ បញ្ជូនទៅតុលាការ ក្រោយគាស់ផ្ទះ យកមាសអស់ជិត២៥០តំឡឹង នៅស្រុកថ្ពង
កំពង់ស្ពឺ ៖ សមត្ថកិច្ចនគរបាលខេត្តកំពង់ស្ពឺ បានបញ្ជូនខ្លួនបុរស២នាក់ ទៅតុលាការខេត្ត ក្រោយសង្ស័យថាបានគាស់ផ្ទះអ្នកលក់គ្រឿងអលង្កា និងប្តូរប្រាក់ យកមាសអស់ជិត២៥០តំឡឹង ហើយគេចខ្លួនបាត់ ។
យោងតាមសម្តីមន្ត្រីនគរបាលព្រហ្មទណ្ឌ នៃស្នងការដ្ឋាននគរបាលខេត្តកំពង់ស្ពឺ នៅព្រឹកថ្ងៃទី២ ខែវិច្ឆិកា ឆ្នាំ២០២៣ បានឱ្យដឹងថា ជនសង្ស័យទាំង២នាក់ខាងលើ បានធ្វើសកម្មភាពគាស់ផ្ទះរបស់ឈ្មោះ ប៊ុន ប៊ុនធឿន ភេទប្រុស អាយុ៤៤ឆ្នាំ និងឈ្មោះ បេង ឡាំអ៉ីម ភេទស្រី អាយុ៣៤ឆ្នាំ នៅភូមិមនោរម្យ ឃុំមនោរម្យ ស្រុកថ្ពង ខេត្តកំពង់ស្ពឺ កាលពីថ្ងៃទី១៤ ខែតុលា ឆ្នាំ២០២៣ ពេលដែលម្ចាស់ផ្ទះនាំគ្នាទៅធ្វើបុណ្យ នៅវត្ត យកគ្រឿងអលង្កាអស់មួយចំនួន ។ ក្រោយធ្វើសកម្មភាពរួច ជនសង្ស័យ ក៏បានប្រមូលគ្រឿងអលង្កាហើយគេចខ្លួនបាត់ស្រមោល ។
មន្ត្រីរូបនេះបន្តថា ដោយទទួលបានបទបញ្ជា និងការចង្អុលណែនាំពីនាយឧត្ដមសេនីយ៍អគ្គស្នងការនគរបាលជាតិ និងលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានដឹកនាំផែនការងារជំនាញព្រហ្មទណ្ឌ អធិការស្រុកនិងជំនាញពាក់ព័ន្ធធ្វើការស្រាវជ្រាវ និងសម្របសម្រួលនីតិវិធីពី អយ្យការអមសាលាដំបូងខេត្ដកំពង់ស្ពឺ ព្រមទាំងបានកិច្ចសហការពីគ្រប់ស្ថាប័នពាក់ព័ន្ធ នគរបាលក្រសួងមហាផ្ទៃ ស្នងការដ្ឋាននគរបាលខេត្ដទាំង៥ បានឈានដល់កំណត់មុខសញ្ញាជនសង្ស័យ បក្ខពួកប្រព្រឹត្ដបទល្មេីសបាន ហើយដល់ការចាប់ខ្លួននិងដកហូតវត្ថុតាងបានមួយចំនួនធំ ។
សមត្ថកិច្ចក៏បានបញ្ជាក់ផងដែរថា ជនសង្ស័យដែលបានឃាត់ខ្លួនមាន ១-ឈ្មោះ ប៉ិច ផាណ្ណៈ ភេទប្រុសអាយុ៣៩ឆ្នាំ លំនៅផ្ទះភូមិសាលាកន្សែង សង្កាត់ស្វាយដង្គុំ ក្រុងសៀមរាប ខេត្តសៀមរាប ។ ២-ឈ្មោះ ណាម វិចិត្រ ភេទប្រុស អាយុ៣៩ឆ្នាំ នៅភូមិកំពង់ពិល ឃុំវត្តតាមឹម ស្រុកសង្កែ ខេត្តបាត់ដំបង ។ ក្នុងប្រតិបត្តិការបង្ក្រាប និងឃាត់ខ្លួនជនសង្ស័យទាំងពីរនាក់ខាងលើ សមត្ថកិច្ចបានដកហូតវត្ថុតាងមួយចំនួន ដែលបានផ្លាស់ប្ដូរទម្រង់ដេីមគ្រឿងអលង្ការ ចំនួនប៉ាន់ស្មាន ២៥០ តម្លឹង លោហៈប្រភេទប្លាកទីន គឹតជាទឹកប្រាក់ប្រមាណ១៦មុឺនដុល្លាសហរដ្ឋអាមេរិក និងរថយន្តព្រូសដែលធ្វើសកម្មភាពមួយគ្រឿង ៕
ដោយ ៖ ប៊ុត សារុន
