ព័ត៌មានជាតិ
សមត្ថកិច្ចនគរបាល ឃាត់រថយន្តធុនធំ ០២គ្រឿងអនុវត្តតាមផ្លូវច្បាប់
បាត់ដំបង ៖ កម្លាំងជំនាញការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តបាត់ដំបង បានចុះអនុវត្តឃាត់បានរថយន្តធុនធំចំនួន ០២គ្រឿង បន្ថែមទៀត ក្នុងករណីល្មើសច្បាប់ហាមចូលក្រុង។
លោកវរសេនីយ៍ទោ អ៊ុន សុភាព នាយរងការិយាល័យនគរបាលចរាចរណ៍ផ្លូវគោក បានប្រាប់អោយដឹងនៅព្រឹកថ្ងៃទី១៦ ខែមករា ឆ្នាំ២០២៤នេះថា ដោយអនុវត្តតាមបទបញ្ជាផ្ទាល់របស់លោកឧត្តមសេនីយ៍ទោ សាត គឹមសាន ស្នងការ ក៏ដូចជាយោបល់របស់លោក វរសេនីយ៍ឯក ប៉ូវ វណ្ណឌី ស្នងការរងទទួលផែនការងារនគរបាលសណ្តាប់ធ្នាប់ និងលោកវរសេនីយ៍ឯក ចាន់ សុធី នាយការិយាល័យនគរបាលចរាចរណ៍ផ្លូវគោកខេត្ត លោកបានដឹកនាំកម្លាំងការិយាល័យជំនាញចុះជាប្រចាំនិងឃាត់បានរថយន្តល្មើសជាបន្តបន្ទាប់ ហើយជាក់ស្តែងនៅព្រឹកនេះដែរក៏បានធ្វើការឃាត់រថយន្តល្មើសបានចំនួន ០២គ្រឿងបន្ថែមទៀតផងដែរ។
លោកនាយរងការិយាល័យដដែលបានបញ្ជាក់ថា ចំពោះរថយន្តធុនធំដឹកធ្ងន់គ្រប់ប្រភេទច្បាប់មិនអនុញ្ញាតអោយចូលក្រុងនោះទេ ព្រោះកាលណាបើកចូលក្រុង វាធ្វើអោយទីមួយខូចផ្លូវ ទីពីរស្ទះចរាចរណ៍ ហើយជាគោលការរបស់លោកប្រធានការិយាល័យ ចំពោះរថយន្តល្មើសច្បាប់ទាំង០២គ្រឿងនេះត្រូវបញ្ជូនទៅការិយាល័យចរាចរណ៍ផ្លូវគោកដើម្បីចាត់ការតាមនីតិវីធី។
ជាមួយគ្នានេះដែរ លោក អ៊ុន សុភាព តំណាងអោយប្រធានការិយាល័យចរាចរណ៍ផ្លូវគោក ក៏សូមអំពាវនាវទៅដល់ម្ចាស់ក្រុមហ៊ុនដឹកជញ្ជូន ក៏ដូចជាអ្នកបើកបរប្រើប្រាស់ប្រភេទយានយន្តធុនធំទាំងអស់ សូមកុំអោយចូលក្រុងទៀត ជៀសវាងកុំអោយខូចផ្លូវ និងកកស្ទះចរាចរណ៍ ហើយបើនៅតែចូលសមត្ថកិច្ចនិងមានវិធានការតាមផ្លូវច្បាប់ ហើយក៏សូមសំណូមពរដល់បងប្អូនធ្វើការដឹកជញ្ជូនគោរពតាមច្បាប់កំណត់របស់ក្រសួងសាធារណការ ដោយដឹកអោយបានត្រឹមត្រូវ កុំដឹកសំពីងសំពោង ហើយរថយន្តកុំអោយកែច្នៃ ខុសលក្ខណៈបច្ចេកទេស ដែលវាអាចបណ្តាលអោយមានគ្រោះថ្នាក់ចរាចរណ៍កើតឡើងធ្វើអោយខូចខាតទាំងសម្ភារនិងអាយុជីវិតដូច្នេះសូមចូលរួមគោរពច្បាប់ចរាចរណ៍ទាំងអស់គ្នា៕ 
ដោយ ៖ សាលី
