ព័ត៌មានជាតិ
ក្រុមហ៊ុនចំការអំពៅនៅស្រុកឆែប បច្ចុប្បន្នកំពុងដំណើរការលើវិស័យកសិកម្មធម្មតា មិនដូចការផ្សព្វផ្សាយថា ក្រុមហ៊ុនក្ស័យធន់នោះទេ
ព្រះវិហារ៖ កន្លងមកថ្មីៗនេះ មានការចុះផ្សាយព័ត៌មានថា ក្រុមហ៊ុនចំការអំពៅនៅស្រុកឆែប ខេត្តព្រះវិហារ បានក្ស័យធន់ក៏ដូចជាក្រុមហ៊ុនអត់ដំណើរការ ទើបមានបងប្អូនប្រជាពលរដ្ឋ យើងមួយចំនួនតូច បានឆ្លៀតឱកាសឈូសឆាយវាទីយកដីក្រុមហ៊ុនដែលរាជរដ្ឋាភិបាលបានសម្បទានឱ្យក្រុមហ៊ុន ។
ពាក់ព័ន្ធការចុះផ្សាយព័ត៌មាននេះ តំណាងក្រុមហ៊ុន លោក ហួង ទង់យែក អគ្គនាយករងក្រុមហ៊ុនចំការអំពៅ រូយ ហ្វេង cambodia international company limited នៅថ្ងៃទី១៦ ខែមករា ឆ្នាំ២០២៤នេះ បានបំភ្លឺជូនក្រុមហ៊ុនអ្នកព័ត៌មានយើងថា ក្រុមហ៊ុនមិនបានក្ស័យធន់ ឬមិនដំណើរការសកម្មភាពវិនិយោគ ដូចការចុះផ្សាយព័ត៌មានមួយចំនួនតូចនោះទេ ។ កន្លងមក ដោយសារកន្លងមកវិបត្តិជំងឺកូវីដ–១៩ ក្រុមហ៊ុនបានផ្អាកផលិតស្ករអំពៅជាបណ្ដោះអាសន្ន ហើយបញ្ហាកូវីដ បានធូរស្រាលក្រុមហ៊ុនបានដំណើរការលើវិស័យកសិកម្ម សាកវប្បកម្ម ម្រេច ដំឡូង ស្រូវជាដើម អ្វីដែលសំខាន់នោះ គឺក្រុមហ៊ុនបង់ពន្ធជូនរដ្ឋ ជារាងរាល់ឆ្នាំ ។ ដោយឡែក ពាក់ព័ន្ធរោងចក្រផលិតស្ករ ក្រុមហ៊ុនបានផ្អាកដំណើរការបណ្ដោះអាសន្នពិតមែន ប៉ុន្តែពាក់ព័ន្ធ និងដីធ្លីកសិកម្មខាងក្រុមហ៊ុននៅដំណើរការធម្មតា ។
លោកអគ្គនាយករងក្រុមហ៊ុន បានបន្តថា កន្លងមកប៉ុន្មានឆ្នាំនេះ បងប្អូនប្រជាពលរដ្ឋយើង បានទទួលដំណឹងមិនពិតថា ក្រុមហ៊ុនចំការអំពៅបានក្ស័យធន់ ពួកគាត់ក៏បានយល់ច្រឡំចូលមកវាទីយកដីសម្បទានរបស់ក្រុមហ៊ុនជាច្រើន ដូចនេះ ក្រុមហ៊ុនជូនដំណឹងតាមរយៈសារព័ត៌មាន តាមរយៈអាជ្ញាធរ ឱ្យដល់បងប្អូនប្រជាពលរដ្ឋ ឈប់ជឿ ឫស្ដាប់ព័ត៌មានមិនពិតថា ក្រុមហ៊ុនក្ស័យធន់ នាំគ្នាមកចាប់ដីក្រុមហ៊ុន ដែលរាជរដ្ឋាភិបាលបានសម្បទាន បន្ដទៅទៀត ជៀសវាងការខាតបង់ពេលវេលា ក៏ដូចថវិការបស់បងប្អូនប្រជាពលរដ្ឋបន្ដទៅទៀត។
តំណាងក្រុមហ៊ុន បានបន្ថែមថា បន្ទាប់ពីប្រជាពលរដ្ឋមួយចំនួនតូច បានលួចភ្ជួរដីទាំងយប់ ទាំងថ្ងៃនៅលើដីរបស់ក្រុមហ៊ុន ក្រុមហ៊ុនក៏បានធ្វើការទប់ស្កាត់ និងជូនដំណឹង ទៅអាជ្ញាធរពាក់ព័ន្ធរបស់ខេត្តព្រះវិហារផង សុំការអន្តរាគមន៍ផងដែរ។
ក្រោយទទួលបានការជូនដំណឹងពីក្រុមហ៊ុន រដ្ឋបាលខេត្តព្រះវិហារ ក៏បានចេញសេចក្ដីជូនដំណឹងកាលពីថ្ងៃទី ២៧ ខែមីនា ឆ្នាំ ២០២៣កន្លងទៅ ដោយយោងតាមអនុក្រឹត្យលេខ១១៨ អនក្រ.បក ចុះថ្ងៃទី ៧ខែតុលា ឆ្នាំ២០០៥ ស្ដីពីការគ្រប់គ្រងដីរដ្ឋ ដោយរដ្ឋបាលខេត្តជូនដំណឹងដល់សាធារណជន ឲ្យបានជ្រាបថា រាជរដ្ឋាភិបាលបានផ្ដល់ដីសម្បទានសេដ្ឋកិច្ចសម្រាប់វិនិយោគលើដំណាំអំពៅ អាកាស្យា និងដំណាំសាកវប្បកម្ម ( ម្រេច ដំឡូងឈើ ស្វាយចន្ទី និងដំណាំស្រូវ ) ជូនក្រុមហ៊ុនចំនួន៥ គឺ ក្រុមហ៊ុន រូយ ហ្វេង .ឡាន ហ្វេង .ហេងរូយ . ហេងយូ .និងហេងណុង cambodia international company limited ស្ថិតក្នុងភូមិសាស្ត្រស្រុកឆែប ស្រុកត្បែងមានជ័យ និងស្រុកជ័យសែន ខេត្តព្រះវិហារ។ដោយកន្លងមក ក្រុមហ៊ុនបានដំណើរការសកម្មភាពវិនិយោគយ៉ាងរលូនរហូតដល់ឆ្នាំ ២០១៩ ដោយសារបញ្ហាជំងឺកូវីដ ក្រុមហ៊ុនបានផ្អាកសកម្មភាពវិនិយោគជាបណ្ដោះអាសន្នមួយរយៈ ធ្វើឱ្យទីតាំងដីក្រុមហ៊ុនដែលធ្លាប់បានដាំដុះកន្លងមក នៅទំនេរ ខណៈនោះ ក៏មានប្រជាពលរដ្ឋមួយចំនួនចូលមកដាំដុះអាស្រ័យផលលើទីតាំងដីនេះ ។ បន្ទាប់មកទៀត ដោយមានការយកចិត្តទុកដាក់ពីរាជរដ្ឋាភិបាល ក្នុងការផ្ដល់វ៉ាក់សាំងក្នុងក្របខណ្ឌទូទាំងប្រទេស រហូតគ្រប់គ្រងសភាពការណ៍បាន និងដាក់ឲ្យដំណើរការប្រទេសជាប្រក្រតីឡើងវិញ ហើយក្រុមហ៊ុនក៏បានរៀបចំដំណើរការសកម្មភាពវិនិយោគ និងដាំដុះឡើងវិញផងដែរ ។ ដូច្នេះរដ្ឋបាលខេត្តព្រះវិហារ សូមជូនដំណឹងឱ្យបងប្អូនប្រជាពលរដ្ឋ ឬអ្នកពាក់ព័ន្ធផ្សេងៗ ដែលមកដាំដុះលើទីតាំងដីរដ្ឋសម្បទានឲ្យក្រុមហ៊ុនទាំង ៥នេះ ចាកចេញដោយមិនអនុញ្ញាតឲ្យដាំដុះ ឬចាត់ចែងលើទីតាំងដីរដ្ឋ ដែលបានចុះបញ្ជីរួចរាល់នេះទៀតទេ ។
សូមបញ្ជាក់ថា ក្រុមហ៊ុនចំការអំពៅស្ថិតនៅស្រុកឆែប ស្រុកជ័យសែនស្រុកត្បែងមានជ័យ ខេត្តព្រះវិហារ ចុះត្រាជាមួយរាជរដ្ឋាភិបាលរយៈពេល៥០ឆ្នាំ ចាប់ពីឆ្នាំ២០១១ រហូតដល់ឆ្នាំ២០៦១ ៕
