ព័ត៌មានជាតិ
ឧត្តមសេនីយត្រី បោន ប៊ិន ៖ មេបញ្ជាការអាវុធហត្ថស្រុកអូរជ្រៅថ្មី ត្រូវខិតខំការពារសន្តិសុខ សណ្ដាប់ធ្នាប់ ជូនពលរដ្ឋ
បន្ទាយមានជ័យ ៖ លោកឧត្តមសេនីត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានមានប្រសាសន៍ ផ្តាំផ្ញើដល់លោកមេបញ្ជាការមូលដ្ឋានកងរាជអាវុធហត្ថស្រុកអូរជ្រៅថ្មី ដែលទើបចូលកាន់តំណែង ត្រូវខិតខំបំពេញតួនាទី ភារកិច្ច ក្នុងការការពារសន្តិសុខ សុវត្ថិភាព រក្សាសណ្ដាប់ធ្នាប់ ជូនប្រជាពលរដ្ឋ ក៏ដូចជាការរួមចំណែកក្នុងការអភិវឌ្ឍមូលដ្ឋាន ក្នុងភូមិសាស្ត្រស្រុកអូរជ្រៅ ។
លើកឡើងយ៉ាងដូចនេះ ក្នុងពិធីប្រកាសចូលកាន់តំណែងលោកអនុសេនីយ៍ឯក ហ៊ូ សារី មេបញ្ជាការរងមូលដ្ឋានកងរាជអាវុធហត្ថក្រុងប៉ោយប៉ែត មកជាមេបញ្ជាការមូលដ្ឋានកងរាជអាវុធហត្ថស្រុកអូរជ្រៅ ជំនួសលោកវរសេនីយ៍ត្រី ជា ពិសី ដែលត្រូវឡើងមកជាប្រធានមន្ទីរសម្ភារៈបច្ចេកទេស នៃបញ្ជាការដ្ឋានកងរាជអាវុធហត្ថខេត្តកាលពីរសៀលថ្ងៃពុធ ទី០៧ ខែកុម្ភៈ ឆ្នាំ២០២៤ ។
ក្រៅពីលើកឡើងខាងលើ លោកឧត្តមសេនីត្រី បោន ប៊ិន បានរំលឹកដល់មេបញ្ជាការថ្មី ត្រូវតែអនុវត្តន៍តាមទិសស្លោករបស់ លោកនាយឧត្តមសេនិយ៍ សៅ សុខា ច្បាប់ត្រូវតែគោរព ប្រជាត្រូវតែបំរើ បទល្មើសត្រូវតែបង្ក្រាប ។ ជាពិសេសត្រូវខិតខំកសាងអង្គភាពឱ្យបានរឹងមាំ មានទំនាក់ទំនង និងសាមគ្គីភាពផ្ទៃក្នុងឱ្យកាន់តែល្អប្រសើរបន្ថែមទៀត ។
បន្ទាប់ពីពីលោក កែវ តារារស្មី អភិបាល នៃគណៈអភិបាលស្រុកអូរជ្រៅ បានមានមតិចូលរួម។ លោកអនុសេនីយ៍ឯក ហ៊ូ សារី បានធ្វើការប្តេជ្ញា ពង្រឹងកិច្ចសហប្រតិបត្តិការជាមួយគ្រប់ស្ថាប័ន អង្គភាព ពិសេសអាជ្ញាធរគ្រប់លំដាប់ថ្នាក់, ពង្រឹង និងរឹតចំណងសាមគ្គីភាព ឱ្យកាន់តែល្អបន្ថែមទៀត ពិសេសសាមគ្គីភាពផ្ទៃក្នុង ដែលជាគន្លឹះដ៏សំខាន់បំផុត ក្នុងការរួមចំណែកកសាងអង្គភាពឱ្យបានរឹងមាំបន្ថែមទៀត៕
