អគ្គិភ័យឆាបឆេះ រោងជាងឈើមួយកន្លែង ដោយមិនដឹងមូលហេតុ

បាត់ដំបង ៖ រោងជាងឈើមួយកន្លែង ត្រូវបានអគ្គិភ័យឆាបឆេះបង្កការភ្ញាក់ផ្អើល នៅវេលាម៉ោងប្រហែល ២៣និង២០នាទី​ថ្ងៃទី២៦ ខែមេសា ឆ្នាំ២០២៤ នៅចំនុចភូមិតាសាញជើង ឃុំតាសាញ ស្រុក សំឡូត ខេត្តបាត់ដំបង ។

ករណីអគ្គិភ័យកើតឡើងនេះ បណ្តាលអោយឆេះរោងជាងឈើមួយកន្លែងដែលមានទំហំ ១៥ គុណ ២០ម៉ែត្រ សង់អំពីឈើ ដំបូលប្រក់ស័ង្កសី(ឆេះអស់ទាំងស្រុង)រួមជាមួយ ,ម៉ូទ័រ០៦គ្រឿង ,ម៉ាសុីន ០២គ្រឿង ,ម៉ាសុីនវាល ០១គ្រឿង ,តាប ០១ ,ឈើប្រណិត០៥ម៉ែត្រគីប ,គ្រែប្រអប់ ០៤ ,ទ្វា ២៦ និងដើមធុរ៉េន ០៥ដើមផងដែរ ដែលមានម្ចាស់ឈ្មោះ ឈួ សំអាត ភេទប្រុស អាយុ៥៥ឆ្នាំ នឹងប្រពន្ធឈ្មោះ ប៊ុន ចាន់ថា អាយុ ៤៥ឆ្នាំ។

នៅក្នុងហេតុការណ៍គ្រោះអគ្គិភ័យខាងលើនេះដែរ យើងនៅមិនទាន់ដឹងថា ផ្តើមចេញពីអ្វីនោះទេ ហើយភ្លាមៗនោះសមត្ថកិច្ច បានចេញរថយន្តពន្លត់អគ្គិភ័យចុះអន្តរាគមន៍ពន្លត់ ដោយប្រើប្រាស់អស់ទឹកចំនួន ០៣រថយន្តផងដែរ ៕
ដោយ ៖ សាលី