ឧត្តមសេនីយ៍ទោ សិទ្ធិ ឡោះ ៖ យុវជនគ្រប់រូប ត្រូវប្រឹងប្រែងរៀនសូត្រ មិនត្រូវនាំគ្នាដើរបង្ករឿង អសន្តិសុខសង្គម ព្រោះនាំឲ្យមានទោសទណ្ឌ

បន្ទាយមានជ័យ ៖ ស្នងការដ្ឋាននគរបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធិ ឡោះ នៅថ្ងៃទី២១ ខែមីនា ឆ្នាំ២០២៣ បានអំពាវនាវដល់យុវជនគ្រប់រូប ត្រូវប្រឹងប្រែងរៀនសូត្រ មិនត្រូវនាំគ្នាដើរបង្ករឿង អសន្តិសុខសង្គម ព្រោះនាំឲ្យមានទោសទណ្ឌ ។

លោកឧត្តមសេនីយ៍ស្នងការ ក៏បានអំពាវនាវផងដែរ ដល់មាតា បិតា ឬអាណាព្យាបាល ត្រូវយកចិត្តទុកដាក់ អប់រំណែនាំកូនចៅឲ្យបានល្អ ព្រោះមួយរយៈថ្មីៗនេះ មានយុវជនមួយចំនួន បានកំពុងភ្លើតភ្លើន តាមរយៈ ការអូសទាញរបស់មិត្តភក្តិមិនល្អ ប្រមូលផ្តុំគ្នាធ្វើរឿងមិនគប្បី បង្កើតបក្ខពួក ក្រុម បង្កររឿងអនាធិបតេយ្យក្នុងសង្គម ដូចជា ជិះម៉ូតូជ្រេពេញតាមដងផ្លូវ ស្ទាក់ដេញវាយបង្កហឹង្សាលើអ្នកដំណើរ ឬវាយ កាប់ ចាក់ គ្នាជាដើម ដែលសកម្មភាពនេះគឺជាអំពើរខុសច្បាប់ ។ យុវជនដែលបានលើកឡើងខាងលើ បាននិងកំពុងសាងនូវគំរូមិនល្អក្នុងសង្គម ជាអំពើរល្មើសច្បាប់ ។ សូមយុវជនដ៏ទៃទៀត ត្រូវធ្វើជាពលរដ្ឋល្អ កូនល្អ កុំយកតម្រាប់តាម ព្រោះវានាំឲ្យបាត់បង់ នូវកិត្តយស សេចក្តីថ្លៃថ្នូរ បង្កអសន្តិសុខដល់សង្គមជាតិ និង មានទោសព្រហ្មទណ្ឌ។

លោកក៏សូមគាំទ្រ និង លើកទឹកចិត្ត ដល់យុវជនគ្រប់រូបដែលប្រឹងប្រែងរៀនសូត្រ ពង្រឹងសមត្ថភាព អភិវឌ្ឍ ចំណេះ ជំនាញ វិជ្ជាជីវៈ ហើយយកចំណេះដឹងទៅប្រើក្នុងផ្លូវត្រូវ  ដើម្បីរួមចំណែកក្នុងការអភិវឌ្ឍន៍សង្គមជាតិ ឲ្យកាន់តែរីកចម្រើន ស្របតាមយុគសម័យឌីជីថល និង រួមគ្នាការពារសន្តិភាព ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល ។

ថ្នាក់ដឹកនាំ នៃស្នងការដ្ឋាននគបាលខេត្តបន្ទាយមានជ័យ នឹងមិនយោគយល់ ឬលើកលែងជាដាច់ខាត ចំពោះបុគ្គលណា យុវជនរូបណា បង្កើតក្រុម បក្ខពួក ដើរអុកឡុក វាយ កាប់ ចាក់ លួច ឆក់ ប្លន់ បង្កភាពអសន្តិសុខ គ្រប់ទំរង់ គ្រប់រូបភាព ក្នុងភូមិសាស្រ្តខេត្ត គឺត្រូវបង្ក្រាប និង ឃាត់ខ្លួនកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់ជាធរមាន ៕