ព័ត៌មានជាតិ
នគរបាលខេត្តបន្ទាយមានជ័យ ឃាត់ខ្លួនជនសង្ស័យ ២នាក់ ជាមួយថ្នាំញៀនជាង ៦គីឡូក្រាម
បន្ទាយមានជ័យ ៖ ជនសង្ស័យប្រុសស្រី ចំនួន២នាក់ ជាមួយថ្នាំញៀនជាង៦គីឡូក្រាម ត្រូវបានកម្លាំងនគរបាលប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ សហការជាមួយកម្លាំងនគរបាលក្រុងប៉ោយប៉ែត ធ្វើការបង្ក្រាបនិងឃាត់ខ្លួន អនុវត្តផ្លូវច្បាប់ ។
លោកឧត្តមសេនីយ៍ត្រី ធិន ស៊ិនដេត ស្នងការរងផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ បានឱ្យដឹងថា ដោយអនុវត្តន៍តាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ លោកបានដឹកនាំកម្លាំងជំនាញ សហការជាមួយកម្លាំងនគរបាលក្រុងប៉ោយប៉ែត ចុះធ្វើការស្រាវជ្រាវរហូតថ្ងៃទី២០ ខែមេសា ឆ្នាំ២០២៤ នៅចំណុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានឃាត់ខ្លួនជនសង្ស័យ ចំនួន២នាក់ រួមមាន ៖ ១-ឈ្មោះ ហេង សុគុណ ហៅ ប៉ាវ ភេទប្រុស អាយុ៤៥ឆ្នាំ ជាអ្នកជួញដូរគ្រឿងញៀន រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ ២-ឈ្មោះ ចឹម ស្រីដា ហៅជូ ភេទស្រី អាយុ២៤ឆ្នាំ រស់នៅភូមិអូឬស្សីលើ សង្កាត់អូឬស្សី ក្រុងប៉ោយប៉ែត ខេត្តបន្ទាយមានជ័យ ។
លោកបន្តថា ការបង្ក្រាបនេះ សមត្ថកិច្ចបានដកហូតនូវវត្ថុតាងមួយចំនួន ដូចជា ៖ ម្សៅម៉ត់សថ្លា (MDMA) ចំនួន០១ថង់ ស្មើនឹងទម្ងន់ ២,១១ក្រាម (សាច់ថ្នាំសុទ្ធ), ថ្នាំកញ្ចប់រូបទំពាំងបាយជូរ មានអក្ស Grapa fraittea (MDMA) ចំនួន៥០០កព្ចាប់ ស្មើនឹងទម្ងន់ ៤៤៧០ក្រាម (សាច់ថ្នាំសុទ្ធ), ថ្នាំកញ្ចប់ពណ៌ក្រហម រូបសេះ (MDMA) ចំនួន៥០០កព្ចាប់ ស្មើនឹងទម្ងន់ ២៣០៥ក្រាម (សាច់ថ្នាំសុទ្ធ), សរុបថ្នាំញៀនទាំងអស់ ស្មើនឹង ៦៧៧៧,១១ក្រាម (សាច់ថ្នាំសុទ្ធ), ទូរសព្ទដៃចំនួន ២ គ្រឿង និងរថយន្តចំនួន ១គ្រឿងម៉ាក ម៉ាកព្រូសពណ៍សផងដែរ ។
បច្ចុប្បន្ន ជនសង្ស័យរួមនិងវត្ថុតាង ត្រូវបានសមត្ថកិច្ចជំនាញ កសាងសំណុំរឿង ដើម្បីបញ្ជូនទៅ សាលាដំបូងខេត្តបន្ទាយមានជ័យ ចាត់ការតាមនីតិវិធីច្បាប់៕
